Etxean aktibo mantentzeko gomendio sorta argitaratu du udalak
Etxebizitzatik irten gabe eta edonork eskura dituen baliabideekin jarduera fisikoa egiteko hainbat jarraibide eman ditu Pasaiako Udalak.
Arroz kilo bat eta galtzerdi zahar bat nahikoa dira hanketako giharrak indartzeko. Irudia: Pasaiako Udala. 
Helburua da jarduera fisikoa egin ahal izatea, etxean ditugun baliabideekin.
Konfinamendua hasi zenetik adituek etengabe aipatu dituzte kirolaren onurak. Gutxieneko jarduera fisikoak, itxialdiaren ondorio fisiko zein psikologikoei aurre egiten laguntzen du. Askok ordea, haien etxeetan ez dute kirola egiteko aukerarik, espazioa eta baliabide falta dela eta, edo besterik gabe ez dakitelako nola egin.
Pasaiako Udalaren Jarduera Fisiko eta Kirol Sailak zalantza guzti horiei erantzuna eman die, etxean aktibo eta osasuntsu mantentzeko gida bat sortuz. Helburua da edonork egin ahal izatea gutxieneko jardun fisikoa, modu arinean eta norberak etxean topa ditzakeen gauzekin. 20 eta 60 minutu bitarteko saioak dira proposatutakoak. Ekin baino lehen, komenigarria izango da kiroleko arropa eta zapata egokiak janztea, etxean eremu zabal eta seguru bat prestatzea eta luzaketak egitea.
Jakiak kirolerako material gisa erabili daitezkeela dio gidak. Arroz kilo batek edota litro bateko ur botila batek, bizeps, trizeps edota sorbaldako giharrak lantzeko erabili daitezke. Hala ere, argi dago pisu pixka bat bat duen edozein produktu erabili daitekeela, betiere, hauskorra ez bada.
Aulki batek luzaketa asko egiteko balio dezake.
Etxeko aulkiak eta ateak, era berean, lagungarriak izan daitezke aurreko objektuekin ariketa zehatz batzuk egiteko, adibidez, hanketako giharrak lantzeko edota luzaketak egiteko. Toalla ala goma batekin bestalde, urrats bat gehiago eman ahalko da, erresistentzia ariketak eginez. Jarduerak egiterakoan arduratsu izatea eskatu du udalak baita ongi hidratatzea ere eta horrekin batera, ongi elikatzea eta atseden hartzea beharrezkoa dela oroitarazi dute.
Nahi duenak, Xabi teknikariarengana jo dezake, saio pertsonalizatuak prestatzen laguntzeko edota edozein zalantza argitzeko. Jarri harremanetan posta elektronikoz, ala telefonoz 634555049 zenbakira deituz. Ariketa guztiak ikusteko, sakatu hemen.
