'Leihoak zabalik' etxeko txikienentzat
Zer esan nahi diozue munduari? galdera egingo diete haurrei, eta beraiek gogokoen duten moduan erantzungo dute: marrazki, ipuin, bertso, poesia, eskulan, argazki, abesti, audio edota iritzi bidez.
Txikienei begira iniziatiba abiatu du Oarsoirriakek. Helburua, iniziatiba berak duena da, hau da, Oarsoaldeko herrietako haur eta nerabeei ahotsa ematea, ahalduntzea beraien iritzi eta erabakiek dagokien espazioa izan dezaten; aintzat hartzea, azken batean. Hausnarketa egin du egoeraren gainean Oarsoirriakek. Argi dio, berezia da bizi dugun egoera, eta bere ustetan, pertsona eta eremu askorentzat suntsitzailea, “ezin ditugu ahaztu inolaz ere marjinetan dauden kolektibo eta pertsonen egoera kezkagarriak, behar bereziak dituztenak”.
Oarsoirriak iniziatibako kideek haurrak edo nerabeak dituzte etxeetan, “bikotean, edo banandutako familia nukleo anitzak, guraso bakarrak… Gure beharrak eta erritmoak oso ezberdinak dira, baina beti errespetatu ditugu, eta halaxe aritu gara auzolanean 2011tik gure inguruko herrietako bizitzan, haurren hitza eta egiteko moduak kontuan har daitezen”.
Guztiontzat arrotza den egoera honek beraiek ere harrapatuta dauzkala esan dute, “heldu batzuk etxetik telelana egiten, beste batzuk lana galduta, soldatapekoak eta autonomoak… haurren ikastetxeko lanak kudeatzen, mimitoak ematen, gure buruak zaintzen”. Lehen zurrunbiloa pasata, baina, indarrak atera dituzte auzolanarekin jarraitzeko, eta Leihoak zabalik iniziatiba martxan jarri dute. “Zer esan nahi diozue munduari? galdera egingo diegu haurrei, eta beraiek gogokoen duten moduan erantzungo dute: marrazki, ipuin, bertso, poesia, eskulan, argazki, abesti, audio edota iritzia izan daiteke”. Haur eta nerabeen ekarpenak iritsi ahala beren web gunera igotzen joango dira. “Etxeko txikien ahotsa plazaratzea oso garrantzitsua iruditzen zaigu, eta hauxe da egoera honetan gure komunitateak egiten duen ekarpen xumea”.
Ekarpenak Oarsoirriak taldearen posta elektronikora bidali behar dituzte, eta egin dutenaren azalpen txiki bat, lanaren izenburua, beraien izena edo nahiago badute izen artistikoa, , herria eta partekatu nahi duten materiala bidali beharko dute.
Horrekin batera, adin txikikoen irudirik balego, euren baimena eta gurasoena sinatuta mezu horretan ekarpenarekin batera bidali behar dute, orri hau beteta.
