[Galeria] 700. urteurrena: balkoi eta leiho biziak
Mendi Urruzuno argazkilariak ere egin du bere ekarpena. Uneak jaso ditu, atondutako balkoi eta leihoak, baina batez ere, atzoko balkoi eta leiho arteko ekitaldiak irudikatu nahi zuen komunitate baten gutasuna, urruneko elkar besarkada erraldoia bildu du pieza txikietan.
Orereta-Errenteria leihoetan. Argazkia: Mendi Urruzuno Egun berezia izan zuten atzo errenteriarrek; 700 urte bete zituen Errenteria-Oreretak. Urteurren garrantzitsua, eta merezi bezala ospatzeko egitaraua prest zuten. Covid-19ak baina erabat baldintzatu ditu gure bizitzak, gure harremantzeko moduak, lan egiteko era, baita ospakizunak egiteko formak ere. Etxean ospatu behar izan zuten errenteriarrek, eta gogotik egin zuten, irudimena eta sormena nagusi. Jon Maya dantzariak zuzendu eta herriko hainbat artistek ondutako luxuzko pieza, Etxeko plazan izenekoa, ginga izan zen. Baita EMKEren Musika Bandak maisuki sortu zuen Zentenarioaren emanaldi berezia.
Mendi Urruzuno argazkilariak ere egin du bere ekarpena. Uneak jaso ditu, atondutako balkoi eta leihoak, baina batez ere, atzoko balkoi eta leiho arteko ekitaldiak irudikatu nahi zuen komunitate baten gutasuna, urruneko elkar besarkada erraldoia bildu du pieza txikietan. Aurpegia eta emozioa jarri die balkoi horiei, bizitza eman die, herri bizia izanik, balkoi eta leiho bizi ere izan behar zuen Errenteria-Oreretak; hala dela erakutsi du, beste behin ere.
Luxua da argazki bakoitza, poesia, herritarren ilusioa, emozioa, poza, elkartasuna… komunitate baten inplikazioa jaso duelako bilduma zoragarri horretan. Argazki horien multzo handi bat, HITZAren eskura jarri du, atzoko ospakizun eder eta berezi hori zabaltzeko.
Eskerrik asko Mendi, eta zu irakurle, gozatu irudiez, benetan ederra delako haietan erakusten dena, baina batez ere iradokitzen dena: Oztopo denak gaindituta, etorkizuna elkarrekin eraikitzen ari den komunitatea.
Sakatu hemen Mendi Urruzunoren blogean sartzeko, 144 leihorekin mosaiko erraldoia sortu du; argazki gainean klikatu, handitu eta ea zure leihoa topatzen duzun….
