Oarsoaldeko 208 pertsonek COVID-19ari lotutako diru-laguntzen inguruko informazioa jaso dute
Koronabirusak eragindako krisi ekonomikoari aurre egiteko helburuz, beharrak dituzten langabeei, autonomoei eta enpresei arreta emateko zerbitzua abiatu du Oarsoaldea Garapen Agentziak.
Irudia: Oarsoaldea Garapen Agentzia. Arreta zerbitzu bateratua, webguneko azalera eraman dute. Alarma egoera indarrean sartu zenetik eta ondorioz, jardun ekonomiko gehienak eten zirenetik, 208 langabetu, autonomo eta enpresei arreta eskaini die Oarsoaldea Garapen Agentziak. Krisi ekonomiko gogorra dator pertsona askorentzat. Administrazio ezberdinek eskainitako diru-laguntzak izapidetzeko orientazio eta laguntza zerbitzua abiatu du garapen agentziak. Prozesuan zehar sor litezkeen zalantzei azalpen bat ematea da helburua.
Gipuzkoako Foru Aldundiak, Oarsoaldea Garapen Agentziak eta gainontzeko eskualdeetako garapen agentziek plataforma bateratua martxan jarri dute. Bertan, krisi ekonomikoari aurre egiteko sortu diren neurri guztien informazio jasoko ahal da. Plataforman gainera, Oarsoaldeko eta herri mailako laguntzen inguruko informazioa ere izango da. Informazioa behar duen edonork, Oarsoaldea Garapen Agentziarekin harremanetan jar daiteke, posta elektronikoz, edota telefonoz 943494129 zenbakira deituz.
Eskariak sektoreka
Arretan eman zaien 208 pertsonetatik, %57a langabetuak izan dira, 120 lagun. %40a bestalde, autonomoak eta enpresak izan dira, 85 guztira. Azkenik etxebizitza gaiekin zerikusia zuten hiru kontsulta egin dira. Oraingoz, diru-laguntzen ingurua galdegin, eta haien egoeraren berri eman diote agentziari. Kezka handia da guztien artean.
Langabetuen profila oso zabala da eta askok ez dute estatuak abiatutako laguntzak eskatzeko eskubiderik eta asko dira egoera prekarioan bizi direnak. Autonomoen artean, lokalen eta hipoteken ordainketa egiteko arazoak izango dituzte. Enpresei ordea, une honetan bizi duten likidezia falta kezkatzen die.
