Portuan gertatutakoa, lan istripua izan zela gogorarazi du LABek
Atzo goizean Erresuma Batuko garraiolari bat zendu zen Pasaiako portuan, arraina deskargatu ondoren. Berarekin, aurten 24 lagun hil dira Euskal Herrian lanean ari zirela eta bi desagertutakoak.
Urtarrilaren 30eko grebaren artxibo irudia Pasaiako Portuan. Atzo goizean Pasaiako Portuan gertatutakoa, lan istripua izan zela gogorarazi du gaur LAB sindikatuak, lanean ari zela hil baitzen gizona. Britainiarra zen, 50 urte ingurukoa eta arraina zekarren Erresuma Batutik Pasaiara. Hain zuzen ere, arraina deskargatu ondoren zendu zen gizona, ustez bihotzekoak jota.
Datuak benetan gogorrak dira; 2020. urtean hasi zenetik, 24 langile hil dira Euskal Herrian haien lanpostuan. Ezin da ahaztu gainera, Verter Recycling enpresak Zadibarren zuen zabortegiko bi langile desagertuta jarraitzen dutela. 70 egun igaro arren, ez dituzte hondakin mendi horretan topatu.
Salbuespenak izan ordez, halako istripuak sistemaren ondoriotzat ditu sindikatu abertzaleak, “langileriarentzat, laneko biolentzia arazo larria da, estrukturala. Inposatzen diguten politika neoliberalaren ondorio zuzena”. Patronala jotzen dute arduradun gisa, “interes ekonomikoak lehenesten ditu, langileen osasuna arriskuan jarriz”. Erakunde publikoek, istripuen arduradunen aurka neurriak hartzea eskatu dute.
Langileek lanetik onik eta bizirik ateratzeko eskubidea dutelako, eredu aldaketa guztiz beharrezkoa dela dio LABek, “laneko indarkeriarekin amaitzeko lan eta bizitza duina bermatu behar dira”.
