Lanean jarraitzen du Atlantikaldiak
Bi egun baino ez dira falta aurtengo Atlantikaldirako proposamenak bidaltzeko, eta antolakuntza lantaldeak horretara deitu ditu herritar eta eragileak
Atlantikaldiaria artxiboko irudi bat. Bi egun baino ez dira falta aurtengo Atlantikaldirako proposamenak bidaltzeko, eta antolakuntza lantaldeak horretara deitu ditu herritar eta eragileak. Egungo egoeraren aurrean zaila dela jaialdiaren nondik norakoak irudikatzea aitortu dute eta sinistuta daude aurtengo Atlantikaldia, herriaren kohesioa eta elkartasuna aldarrikatuko duen festa bilakatuko dutela. Horretarako, egitarau berezia eskaintzeko lanean ari dela jakinarazi du, “eta ohikoa denez, eragileekin batera osatu nahi dugu”.
Dagoeneko hamaika proposamen jaso dituzte, eta eskerrak eman dizkie antolakuntzak “beren ideia berritzaileekin jaialdia elikatzen” duten herritar eta eragileei, “gizartean eta herritarrengan antzematen den elkartasuna, etorkizuneko jendartea eratuko duen zutabe bilakatuko da. Atlantikaldia argi izpi bat izatea nahi dugu, une batez, etorkizunera begira jarri eta , laster, elkarrekin gozatzeko jaialdia irudikatu”.
Ortzimugak, hori Atlantikaldiaren aurtengo leloa, “egungo errealitateak edukiz bete duen leloa. Zeruak eta itsasoak bat egiten duten puntu hori, lehenaldi eta etorkizunaren arteko metafora bilakatuta, garaien arteko inflexio puntua bihurtu da”.
Proposamenak, formulario bidez helarazi behar dira.
Kartela martxan
Sorkuntzak berebiziko garrantzia izango du kultur topagune eta musika festibalean aurten ere. Jaildiaren irudia izango den kartela, elkarlan baten emaitza izango da. Aurten Atlantikaldiaren bi ertzak batuko ditu sorkuntzak: Malmo Ilustrazio Estudioko J. Angel Perotxena elizondoarra, eta Argenitinako Studio Josefako Josefa Coimbra izango dira egileak.
Elkarlanaren emaitza aste batzuk barru erakutsiko dute.
