Edadetuak eta langileak omenduko ditu Gaztañok
Hurrengo hitzordua, ostiralean, Maiatzaren Lehenean finkatu dute. Langileen Nazioarteko Eguna izanik, langileak omenduko dituzte, baina baita auzoko edadetuak ere.
Gaztaño, konfinamendutik ikusita. Argazkia: Ixiar Garcia COVID-19ak eragindako osasun larrialdia hasi zenetik, ez du hutsik egin Gaztañoko auzotarren sareak. Egoera zaurgarriena duten auzotarrak laguntzeko sortu zen sarea, baina udalerrian Zaintza Sare Komunitarioa martxan jarri zenean, auzotarrek, oro har izan ditzaketen bestelako beharrak asetzen saiatzen ari dira. Orduz geroztik, 114 bizilagun daude saretuta berariaz sortutako whatsapp talde batean. Helburua sare sendoa sortzea elkar zaintzeko, elkar entzun, eta partekatzeko. Horretan ari dira, eta asko dira egin dituzten ekintzak auzotarrei berrogeialdia arintzeko asmoz, eta batez ere elkartasuna helarazteko.
Hurrengo hitzordua, ostiralean, Maiatzaren Lehenean finkatu dute. Balkoi eta leihoak izango dira auzotarren topagune, sarea trinkotzeko agertokiak, baita beraien artean batak besteari indarra transmititzeko abagunea. Langileen Nazioarteko Eguna izanik, langileak omenduko dituzte, baina baita auzoko edadetuak ere, ongi merezia dute batzuek eta besteek. 12:00etan Maritxu sorginak musikatuko du aitortza ekitaldi hori, eta auzotarrek, berriz, girotu egingo dute balkoi eta leihoetan.
Ez da egin duten ekintza bakarra berrogeialdian: Gaztaño bizirik kantuz, Aberri poteo musikatua, Gaztañotik mundura musikala, Pirata haurren eguna edota Rock festa ere egin dituzte.
Martitxu pirata arduratzen da musika jartzeaz, whatsapp taldean auzotarrek egindako eskaerak betetzeaz; streaming bidez egiten dute zuzenekoa, eta dena zuzen ateratzeaz Gaztaño Wifi sarea arduratzen da, Gaztañon wifi sare propioa dutelako.
Ostiraleko hitzordua, 12:00etan egin dute balkoi eta leihoetan; beti bezala, ezinbestekoa sorkuntza, imajinazioa eta noski, umore ona.
