Zaurgarrienei FFP2 maskarak banatzeko eskatu dio EH Bilduk gobernu taldeari
Osasun larrialdiaren lehen egunetatik hasitako bidea egiten jarraitzen du Lezoko EH Bilduk. Hainbat eskaera eta proposamen zehatz egin dizkio Lezoko Gobernu Taldeari, eta beste eskaera batekin dator orain. FFP2 motako musukoak edo maskarak banatzea eskatu dio osasun arrazoiengatik, edota arrazoi ekonomikoengatik zaurgarrienak diren herritarrei.
Zaurgarrien artean FFP2 maskarak banatzea eskatu dio udalari EH Bilduk. Osasun larrialdiaren lehen egunetatik hasitako bidea egiten jarraitzen du Lezoko EH Bilduk. Hainbat eskaera eta proposamen zehatz egin dizkio Lezoko Gobernu Taldeari, eta beste eskaera batekin dator orain. FFP2 motako musukoak edo maskarak banatzea eskatu dio osasun arrazoiengatik, edota arrazoi ekonomikoengatik zaurgarrienak diren herritarrei. Hasiera batean zailtasunak izugarriak izan zirela maskarak eskuratzeko ekarri du gogora koalizio subiranistak, “denok ikusi, irakurri edo jakin dugu ospitaletako, adinekoen egoitzetako nahiz langile soziosanitarioek izan dituzten gabezien berri”, baina egun, egoera hori aldatu eta maskaren stockak gora egin duela, “hau guztia kontutan hartuta egin dugu gure proposamena”.
Zehazki, eta lehentasun gisa, arrisku taldearen barruan dauden 65 urtetik gorako edota osasun arazoak dituzten herritarrak, edo arazo ekonomikoengatik egoera zaurgarrienean daudenak izango lirateke proposatutako neurriaren onuradunak. Horiek lehentasuna lukete, “herritar guztien egoera eta bizi baldintzak ez dira berdinak. Baina ez du horrek esan nahi gainerako herritarren artean banatzeko aukera baztertu behar denik; egoeraren arabera aztertu beharreko pausoa izan daiteke”.
Maskara banatzaile batekin harremanetan ere jarri dela azaldu du koalizio subiranistak, “eta gobernu taldeak gure proposamena ontzat hartuko balu, musukoak denbora gutxian izan genitzake eskura”.
Egungo egoeraren testuinguruan egindako proposamena da. Izan ere, aurreko igandetik 14 urtetik beherako haurrek ordubetez kalera paseatzera irteteko aukera dute baldintza jakin batzuk beteta; larunbatetik aurrera tarte batean ateratzeko aukera izango dute gainerako herritarrek ere, oraindik ere, zein baldintza beteta egingo den zehaztu gabe badago ere —gaur emango dute informazio hori—. Konfinamenduaren arintzea nola izango den osoki jakiterik ez badago ere, adituek, maskarak erabiltzea onuragarria eta gomendagarria dela esan dutela nabarmendu du EH Bilduk, “baliteke, epe motzean, eremu batzuetan musukoak erabiltzea beharrezkoa izatea, gainera”.
FFP2 maskarak zergatik?
EH Bilduk gobernu taldeari luzatutako eskaeran, maskara zehatzak banatzea eskatu dio: FFP2 maskarak. “FFP2 musukoak ingurukoak babesteaz gain, norbera ere babesteko balio dute, eta behin baino gehiagotan erabil daitezke”.
