LGTBIfobia pairatzen ari direnentzat, helduleku bat
LGTBIfobia pairatzen ari diren herritarrei begira zerbitzua martxan jarri du udalak. Bi telefono zenbaki eskura: 010 eta 943 449 600.
LGTBIfobia pairatzen dutenei artatzeko zerbitzua martxan jarri du udalak. Herritar denentzat, gehiago edo gutxiago izaten ari da zaila COVID-19ak eragin duen egoerara moldatzea. Badira ordea, zaurgarriagoak diren kolektiboak, itxialdiak bereziki eta gogorrago kolpatzen dituena: indarkeria matxista pairatzen duten eta erasotzailearekin egun osoa lau pareta artean eman behar duten emakumeak, tratu txarrak pairatzen dituzten haurrak, buruko gaixotasunak dituzten pertsonak, bakardadean bizi diren adinekoak… Zaurgarrien talde horretan sartu behar dira ere LGTBI+ komunitatea osatzen duten pertsonak. Asko eta askorentzat, eramangaitza izango da egoera, beren nortasun eta izaera aukera onartzen ez duten senideekin partekatu behar dutelako ohikoa baino denbora askoz ere gehiago.
Egoera eramangaitz hori ez da, baina, etxe barruan soilik ematen dena. LGTBI+ kolektiboko kide asko armairura itzuli behar izan dira, eta are larriagoa da egoera hori haur eta gazteen artean beraien etxeetan onartzen ez badute beraien errealitatea.
Eraso larri baten berri sare sozialen bidez izan dute herritarrek. Bolo-bolo ibili da hilabete hasieran Benidorm (Alacant, Herrialde Katalanak) bi polizia munizipal emakume transexual bati egindako erasoa. Inpunitate osoz iraintzen du polizia kotxe barrutik beraietako batek emakumea, besteak guztia telefonoarekin grabatzen duen bitartean. Gogorra oso irudia; kaletik doan pertsona bat hala iraintzea eta gainera grabatzea badute bi polizia horiek, egun argiz, beste egoera batzuetan zer egiteko gai izango diren zer pentsatu ematen du, behintzat.
Oihartzun handia izan du erasoak; polizietako bat gorroto delitua egotzita atxilotu dute, eta besteari berriz laguntza ukatzea egotzi diote. Emakumeak, berriz, bere herria utzi behar izan du jaso dituen mehatxuengatik.
Euskal Herritik, Errenteria-Oreretatik ehunka kilometrora gertatu da hori. Baina horrek ez du esan nahi bertako LGTBI+ komunitateak ez duela jarrera LGTBIfobikorik pairatzen, norberaren bizilekuan kasu batzuetan, ikastetxeetan, edota kalean besteetan. Horri begira, Errenteriako Udalak, LGTBI+ Mahaiarekin elkarlanean, alarma egoeran LGTBIfobia pairatzen ari diren herritarrak artatzeko zerbitzua jarri du martxan.
Kasu horietarako bi telefono zenbaki, astelehenetik ostiralera, 09:00etatik 17:00etara arituko dira deiak jasotzen: 010 eta 943 449 600. Bertan deia artatzen duten langileen bidez, LGTBI+ Mahaia osatzen duten kideak harremanetan jarriko dira deitzen duten pertsonekin, zaintza eta laguntza eskaintzeko.
Ez da LGTBIfobiaren aurka udalak egiten duen lehen urratsa; Zuriñe Rodriguez eta Eli Etxabeguren ikerlariek Errenteria-Oreretako LGTBI kolektiboaren gainean egin duten diagnostikoa aurkeztu zuen udalak joan den ekainean. Errenteria-Oreretak indarkeria sexista eta LGTBIfobiarik onartzen ez duela dioten seinaleak jarri zituen udalak pasa den azaroan, halaber, herriko lau sarreretan: Errenterian eraso sexistei aurre egiten diegu. Lesbofobia, homofobia, transfobia, bifobia eta interfobiarik gabeko udalerria, diote seinale horiek
Orain abiatu duen zerbitzua, bide horretan egindako beste urrats bat da, herritar orok aske izan eta bizitzeko duen eskubidea bermatzeko urrats bat gehiago.
