Patxi Ruiz euskal presoaren borrokaldia babestuko dute gaur Lezon
Patxi Ruiz euskal presoaren borrokaldia babestuko dute gaur Lezon. 20:30ean elkarretaratzea egingo dute Saldisen, osasun segurtasun neurriekin.
Patxi Ruiz. Patxi Ruiz euskal preso nafarrak zazpigarren eguna du gaurkoa gose eta egarri greban. Hark eta hainbat euskal presok borrokaldia hasi zuten COVID-19 birusak espetxeetan duen eraginaren aurrean neurriak hartzeko, eta horren segida da Ruizek abiatutako gose eta egarri greba. Hari babesa emateko, gaurko (hilak 17, igandea) 20:30ean elkarretaratzera deitu dituzte herritarrak Saldise plazan. Orain Herriak deitutako mobilizazioa da. Murtzia II espetxean dago Txantreakoa; Mikel San Sebastian euskal preso lesakarrak bat egin zuen harekin, gose greba hasiz asteazkenean (Murtzia IIn dago ere bai).
Zehazki, AEM Amnistiaren Aldeko eta Errepresioaren Aurkako Mugimenduak azaldu duenez, preso eriak eta zigorraren zati handiena betea dutenak askatzea eskatzeko, baita bisitak jasotzeko eskubidea aldarrikatzeko eta ez kutsatzeko neurriak eskatzeko hasi zuen astelehenean borrokaldia Ruizek.
Gaurko elkarretaratzera deitu dutenek koronabirusak eragindako larrialdi egoeraren barruan dauden segurtasun neurriak bete nahi dituzte. Horregatik, bertan izan nahi dutenei pixka bat lehenago ager daitezela eskatu diete, egoki antolatze aldera. Mobilizaziora joango direnei eskatu diete maskarak eta eskularruak eraman ditzatela, eta elkarretaratzean segurtasun distantzia manten dadila. Hein berean presoen aldeko edo Ruizen borrokaldia babesteko euskarriak eraman daitezela eskatu dute.
