Pasaiako udaleku irekiak, bertan behera
Pasaiako Udalak jakinarazi duenez aurten ezingo dira egin udaleku irekiak. Izena eman dutenei matrikularengatik ordaindutakoa itzuliko zaie osotasunean.
Neurri sanitarioek behartuta, aurten ezingo dira udaleku irekiak. Irudia: Pasaiako Udala.
Eudel, Euskadiko Udalerrien Elkarteak egindako gomendioei jarraiki, udaleku irekiak bertan behera uztea erabaki du Pasaiako Udalak, ez baitira baldintza sanitarioak ematen, koronabirusa dela eta. Irailaren 15era arte hainbat motatako ekintzak ez egitea gomendatu du Eudelek, tartean udalekuak. Era berean Gipuzkoako Foru Aldundiak ere, bere baitan dauden udaleku eta gazte oporraldiak bertan behera uztea erabaki du.
Pasaiako Udalaren Haur, Nerabe eta Gazteen Sustapen Sailak ere, honako egoera aurreikusia zuela oroitarazi du. Udalekuen matrikulazio deia egitean, argi adierazi zuen neurri sanitarioen arabera, bertan behera gelditu zitezkeela. Dagoeneko izena eman dutenei, matrikularen diru kopuru osoa itzuliko zaie.
Datozen egunetan, udala harremanetan jarriko da famili horiekin, posta elektronikoz zein gutunez, beharrezko datuak eskatzeko. Dirua, dekretu bidez jasoko dute.
