Patxi Ruizi babesa Lezon
Patxi Ruizi babesa Lezon atzo arratsean. Euskal preso nafarrak zortzi egun bete ditu gaur gose eta egarri greban Murtzia II espetxean.
Atzoko elkarretaratzearen irudia. Argazkia: Orain Herria. Patxi Ruiz euskal preso nafarrak zortzi egun daramatza gaur gose eta egarri greban. Horren harira, elkarretaratzea egin zuten atzo arratsean Orain Herria taldeak deituta. Segurtasun neurriak betez bildu ziren protesta egitera Saldise plazan. Murtzia II espetxean dago txantrearra.
AEM Amnistiaren Aldeko eta Errepresioaren Aurkako Mugimenduak azaldu duenez, preso eriak eta zigorraren zati handiena betea dutenak askatzea eskatzeko, baita bisitak jasotzeko eskubidea aldarrikatzeko eta ez kutsatzeko neurriak eskatzeko hasi zuen joan den asteko astelehenean borrokaldia Ruizek: “Alarma Egoeran zanpatutako eskubideen alde protesta egiteagatik, zenbait espetxezainek ondorioak jasanaraziko zizkiotela egin zioten mehatxu. Ondorioz, Patxik bere osasuna eta duintasuna defendatzeko, hil ala biziko borroka abiatu du”.
