Presoen egoeraren konponbidearen parte izateko urratsak ematera deitu dute
Sarek Izan bidea dinamika aurkeztu du, presoen egoeraren irtenbidean urratsak emateko asmoz. Adostasun handia aprobetxatu behar dela esan dute.
Oiartzungo Sarek Izan bidea dinamika aurkeztu zuen atzo eguerdian, Oiartzungo plazan. Presoen egoerari aterabidea emateko helburua dauka Izan bidea-k.
Azaldu zutenez, azken hilabeteetan espetxeetan bizi izan den larrialdi egoerak orain arte ikusi gabeko adostasuna lortu du. “Hasi Gasteizko eta Nafarroako legebiltzarretik, Euskal Herriko sindikatu eta eragile sozialetatik pasatu eta Estatuko beste hainbat herrialdetako alderdi eta erakunde ezberdinetara iritsiz”, esan dute.
Done Eztebe plazan elkartu ziren atzo, Izan bidea dinamikari hasiera emateko.
Egoera aprobetxatu beharra dagoela iritzi du Sarek, presoen egoerari aterabidea emateko. COVID-19ak sortutako larrialdiak espetxeetako egoera “agerian utzi” duela esan zuten, eta salbuespen legediaren ondorioak “oso larriak” direla.
Gezi urduna jarraituz
Izan bidea dinamikaren irudia gezi urdin bat da. Presoak etxeratzeko bidea irudikatu nahi dute horrekin, eta bide hori egiteko gizartearen aktibazioa bilatuko dute.
Erronka bat bota diete euskal herritar guztiei: 3.127.326 kilometro egitea, herritar bakoitzeko bat. Urrats horiekin elkarbizitza eta bakearen bidea urratu nahi dute. Kontaketa egiteko, aplikazio bat sortu dute. Android sistema duten sakelako telefonoetan Play Storen aurki daiteke Izan bidea bilatuta. App Storen aurrerago jarriko dutela jakinarazi dute.
Horregatik, banaka, taldeka, familian edo dena delakoan kilometroak egitera deitu dute. Atzo lehenengo kilometroa egin zuten, baina datozen hilabeteetan Oiartzunen milaka izango dira egingo dituztenak. “Ekimenaren ikur izango den geziaren atzetik jarri eta guztiok elkarrekin bideari hasiera emango diogu”.
