Ez jairik ezta sorgin gaurik ere aurten Gaztañon
Hilaren 19an, balkoi eta leihoetatik aurreko urteetako jaietako kamisetak zintzilikatzeko eskatu diete auzotarrei.
Irudi hau ez da errepikatuko aurten, COVID-19a dela eta. Gaztañok ez ditu aurten jaiak ospatuko, ezta Sorgin Gaurik egingo. COVID-19ak herri eta auzoetako jaiak ere baldintzatu ditu, eta horren aurrean bertan behera uztea aurtengoak erabaki dute Gaztañon. Maritxu Mozkorrak, jaiei hasiera emateko ardura duen sorginak eman die berri bizilagunei jai batzordearen ordezkari gisa.
Hala ere, ez ohiko moduan bada ere, jaien izpirituarekin bat egitera deitu ditu auzotarrak etxeetatik, osasun larrialdia hasi zenetik egin duten agertoki beretan: balkoi eta leihoetan. Hala, hilaren 19an aurreko urteetako jaietako kamisetak zintzilikatzeko eskatu diete auzotarrei. Sorgin Gauari begira, berriz, hilaren 23an, 23:00etan kandela bat pizteko eskatu diete leiho edo balkoietan, su garbitzailea gogoratuz.
