Larunbatetik aurrera bisitatu ahalko da Mater Ontzi Museoa
Asteburuan irekiko dute Mater Ontzi Museo Ekoaktiboa. Oraingoz, hitzordua aldez aurretik eskatu beharko da eta gehienez ere, zazpi lagunez osatutako taldeak sartu ahalko dira une berean.
Gehienez ere, zazpi lagun egon ahalko dira museoan une berean. Ekainaren 6an (larunbata) irekiko da Pasaiako Mater Ontzi Museo Ekoaktiboa. Asteburutik aurrera beraz, Materren ontziratzeko aukera izango dute aldez aurretik hitzordua eskatu duten bisitariek. Materren izaera berezia dela eta, arrantzontzian segurtasuna bermatzeko bermatzeko hainbat neurri berezi hartu dituzte arduradunek. Hainbat tokitan espazioa mugatua denez, gehienez ere zazpi lagun egon ahalko dira museoan une berean. Gainera, gel desinfektatzailea hartzeko bi gune izango dira eta museoa bera maiz garbituko da.
Langileak lanari ekiteko “gogoz” daudela adierazi dio HITZAri Eneko Sarasua, museoko arduradunak. Herritarrei museoa “lasai” bisitatu dezatela adierazi die, segurtasuna “uneoro” zainduko baitute. Etenaldia “gogorra eta uste baino luzeagoa” izan dela azaldu du Sarasuak, izan ere, bi hilabetez itxia egon ondoren, martxoan hasi zuen Materrek 2020ko denboraldia. Larunbatetik aurrera eutsiko diote martxoan hasitako bideari.
