Herritarrek egoki kudeatu dituzte beren hondakinak
Gehienak ondo eta arduraz aritu dira COVID-19aren osasun larrialdian ere, hori ondorioa; datu horiek ordea, ezerezean geldi daitezkeela esan du udalak, "herritarren zati batek muzin egin diolako bere erantzukizunari".
Edukiontziak Agustinak auzoan. Apirilean %62 izan da hondakinen gaikako bilketaren tasa. Horrek erakusten du, egoki ari direla kudeatzen herritarrak sortzen dituzten hondakinak. Hala jakinarazi du udalak komunikabidetara helarazitako prentsa ohar bidez, eta nabarmendu, ingurumenak eta osasun publikoak eskertzen dutela jarrera hori.
Gehienak ondo eta arduraz aritu dira COVID-19aren osasun larrialdian ere, hori ondorioa; datu horiek ordea, ezerezean geldi daitezkeela esan du udalak, “herritarren zati batek muzin egin diolako bere erantzukizunari, eta azken hilabeteetan utzi dituztelako herriko kaleetan, inolako ardurarik gabe, altzariak eta bestelako hondakin handiak udalak duen doako zerbitzua baliatu gabe”.
Altzariak eta hondakin handiak utzi dituzten eremuetan informazio oharrak jartzea aurreikusi du udalak aurrerantzean.
Berriro eskatu du udalak altzariak eta etxe hondakin handiak biltzekoz erbitzua baliatzeko. Horretarako, 943 341 345 telefono zenbakira deitu behar dute astelehenetik ostiralera 08:00etatik 15:00etara adosteko jaso beharrekoak eramateko biltzeko eguna, ordua eta lekua. Altzari eta hondakin handi horiek San Marko mankomunitatearen garbiguneetara ere eraman daitezke (Oiartzun, Garbera…).
Hondakinen 2017ko Udal Ordenantzak 750 euro arteko isunak aurreikusten dituela kalean hondakinak bota edo uzteagatik ekarri du gogora azkenik, eta hor sartzen direla altzariak ere.
