Zuhaitz eta Pagadi oiartzuarren artean ibili dira
Pasa den astean elkarrizketatu zituzten protagonista izango direnak, eta atzo grabatu zuten saioa Haurtzaroko frontoian. Hilaren 14an emango dute.
Ikastolan grabatu zuten, segurtasun distantziak mantenduz. Oiartzun hazten ari den herria da, baina oraindik herri txiki izateko estandarren barruan sartzen dela dirudi. Hala pentsatu zuten Herri txiki, infernu handi ETB1eko saioa egiten dutenek.
Izan ere, pasa den astean elkarrizketak egiten aritu ziren, eta atzo grabatu zuten saioa, Haurtzaro Ikastolako pilotalekuan. Protagonista izango direnen zerrenda aurreratu dute saioko arduradunek: Amalur Arbelaitz, Joxe Mitxelena, Joxe Leon Kazabon, Dolores Leonet, Nekane Martiarena, Jaxinto Lasarte, Nikolas Mitxelena Otsua eta Mikel Mitxelena Pelu.
Edizio eta muntaia lanak bukatuta, Zuhaitz Gurrutxaga eta Mikel Pagadizabalek aurkezten duten saioaren Oiartzungo atalak badu aireratze data: hilaren 14a.
COVID-19ak bizitzako arlo guztietan izan du eragina, baita Herri txiki, infernu handi saioan ere. Denboraldia eten zien, eta berriro bueltatu dira kalera. Urdazubin grabatu zuten aro berriko lehenengo atal hori, eta etzi gauean 22:00ak bueltan, emango dute.
