Ijurkon egingo den igogailuaren obrak lizitaziora atera dira
Eskaerak aurkezteko epea hilaren 22an amaituko da. Lezoko Udalaren arabera, obrak irailean hasiko eta lau hilabete iraungo dute.
Aralar eta Auñamendi kaleak lotuko ditu igogailuak.
Ijurko auzoan egingo den igogailu publikoaren obrak lizitaziora atera ditu Lezoko Udalak. Gauzak horrela, enpresa interesdunek hilaren 22ra arteko denbora tartea izango dute haien eskaerak aurkezteko. Eskaintza lehiakorrena egiten duen enpresak burutuko ditu igogailuaren obrak. Lezoko Udalaren aurreikuspenen arabera, obrak irailean hasiko dira eta lau hilabete iraungo dute. Igogailua 2021erako martxan izatea espero da.
Ijurkoko igogailua, udal gobernuaren Irisgarritasun Plan Bertikalaren parte izanik Lezon egingo den bigarrena da. Bestea, 2019an Altamiran eraikitakoa da. Aralar eta Auñamendi kaleen arteko altuera desorekari erantzun nahi dio igogailu berriak. Plana iazko irailean aurkeztu zen eta hainbat bizilagunek proposatutako aldaketak eginda, lizitaziora ateratakoa da azken emaitza.
Igogailua hiru ate izango ditu. Sarrera, Aralar kalean kokatuko da eta hurrengo bi geldialdiak Auñamendi kaleko puntu ezberdinetan izango du. Irisgarritasuna bermatuta egongo dela ziurtatu du udalak.
