Kultur espazio bat gehiago, hilaren 12an irekiko da Albaola
Asteburuaren hasierarekin batera, herritarrek itsas kultur faktoriaz gozatzeko aukera izango dute. Berri ona ospatzeko, asteburu honetan, sarrerarekin batera ontziaren ibilbideaz gozatzeko aukera izango dute bisitariek, doan.
Ekainean, asteburuetan soilik bisitatu ahalko da Albaola. Pasaiako Albaola Itsas Kultur Faktorian hilaren 12an (ostirala) berrekingo diote bisitariak hartzeari. Hiru hilabete luze eman ditu Albaolak kanpoko bisitarik jaso gabe. Bada, lanabesak zorrozten hasi dira eta dagoeneko entzun daitezke trabesa eta trontzaren soinua. Irekiera ospatzeko, aukera paregabea eskainiko die Albaolak bisitariei asteburu honetan. Sarrerarekin batera, ontziaren joan etorriaz gozatu ahalko dute doan.
Aurreko astetik zabalik dira zenbait museo. Ostiralean Albaola batuko zaio multzo horri. Hala ere, irekierarekin batera hainbat neurri berezi ere iragarri ditu itsas kultur faktoriak. Uda guztian zehar aldez aurretik egin beharko da erreserba, Albaolara joan baino lehen. Interesdunek posta elektronikoz egin dezakete baita telefonoz ere, 943 39 24 26 zenbakira deituz.
Oraingoz ordutegi murriztua izango du museoak. Ekainean ostiral, larunbat eta igandeetan baino ez da irekia izango, 10:00etatik 14:00etara eta 15:00etatik 19:00etara. Bisita egiteko hizkuntza, bisitarien nahien araberakoa izango da eta taldeak, gehienez ere 31 lagunez osatuko dira. Ontzia, Trintxerpeko ontziralekutik hartuko dela nabarmendu dute Albaolakoek. Kontutan hartu behar Ondartxoko pasealekua itxita jarraitzen duela eta ontzia dela ontziola zaharrera iristeko modu bakarra.
