Astelehenetik aurrera martxan izango dira Pasaiako kirolguneak
Trintxerpe eta Donibaneko kirolguneez gain, Antxoko Ibaiondo frontoia alokatzeko aukera izango dute berriz ere herritarrek. Bizibadia bizikleta mailegu zerbitzua ere aktibatu du Pasaiako Udalak.
Oraingoz, banakako jarduera fisikoa baimenduko da. Taldekako ekintzak debekatuta jarraitzen dute. Datorren astetik aurrera pasaitarrak herriko kirol instalazioak erabiltzen hasi ahalko dira. Hilaren 15ean (astelehena) irekiko dituzte Donibaneko eta Trintxerpeko kirolguneak. Antxoko Ibaiondo frontoia ere alokatu dezakete herritarrek bertan kirola egiteko. Era berean, Bizibadia bizikleta mailegu zerbitzua martxan jarriko dela jakinarazi du Pasaiako Udalak.
Osasun Sailaren oniritzia jasota, espazio horietan berriz ere kirola egin ahalko da, baina ez erabateko normaltasunez. Gehienezko edukiera %60ra mugatzeaz gain, muskulazio eta fitness gailuen arteko tartea handiagoa izango da. Horretarako, bi kirolguneetan libre zeuden areto guztiak okupatu behar izan dituzte. Osasun egoeraren arabera, gehienezko edukiera alda daiteke.
Ez da txandarik eskatu beharko aldez aurretik, baina ezingo da sartu aretoak beteta badaude, Kirolguneen sarreran adieraziko da zenbatekoa den gehiegizko edukiera eta zenbat erabiltzaile dauden une bakoitzean. Oraingoz, banakako jarduera fisikoa baino ez da baimenduko. Programatutako ekintza kolektiboak aurreragorako iragarri dituzte.
Beste erabiltzaileekin partekatzen den espazioetan maskara eraman beharko da uneoro eta fitness aretoan eskuoihalarekin sartzea eskatu dute, baita edango diren likidoak etxetik eramatea ere. Aldagelak eta dutxak ere erabili ahalko dira, baina zentzuzko segurtasun neurriak zainduz. Herritarren segurtasuna bermatzeko, kirolguneak prozedura berezi baten bidez desinfektatu dira, eta ohiko garbiketa zerbitzua ere indartuko da.
Kirolguneen ordutegia ikusteko edota harremanetan jartzeko, sakatu hemen.
