Kirol jarduerez josia dator uda Oarsoaldera
Oarsoaldeko lau udalek Uda 2020 Kirol Kanpaina prest dute bederatzigarren urtez. Elkarlanaren helburua, lau udalek dituzten baliabideak modu eraginkorrenean erabiltzea da eta herritarrei aukera zabalagoa eskaintzea.
Piraguak Pasaiako badian Oarsoaldeko lau udalek Uda 2020 Kirol Kanpaina prest dute bederatzigarren urtez. Elkarlanaren helburua, lau udalek dituzten baliabideak modu eraginkorrenean erabiltzea da eta herritarrei aukera zabalagoa eskaintzea. Aurtengo udako kirol kanpainak ekaina eta iraila bitartean egiteko hamar jarduera baino gehiago biltzen ditu, hau, gazte zein helduei begira, eta dagoeneko zabalik da izena emateko epea.
COVID-19a eragindako osasun larrialdiak eragina izango du eskaintza horretan, eta horrenbestez, indarrean dauden osasun eta segurtasun neurriak betetzeko, kirol eskaintza osatzeko aukeratutako kirol jarduerak nagusiki eremu irekietan egitekoak eta interakzio gutxi eskatzen dutenak dira. Barnean egingo diren jardueren kasuan, instalazioek praktika egokia bermatzen dutela esan dute antolatzaileek. Aurreko urteetan baino jarduera gutxiago eskainiko dira, baina guztiek bermatuko dituzte osasun eta segurtasun neurriak.
Parte hartzaileek, antolatzaileek jarduera bakoitzerako ezarritako neurriak betetzeko konpromisoa hartu beharko dute.
Lau udalek osatu duten eskaintza bateratua eskuorri bakarrean bildu dute; hala ere, jarduera bakoitzeko informazio zehatzagoa nahi izanez gero, esku orrian adierazten diren webgune eta telefonoak erabili edo udal webguneak bisita daitezke.
Aurtengo eskaintzan nagusi dira ur jarduerak: piraguismoa, arrauna, paddle surfa edo igeriketa saioak antolatu dituzte kanpainaren barruan. Horiez gain, tenisa, eskalada, padel hastapena, entrenamendu funtzionala edota multifitness saioak ere antolatu dituzte. Ez dira bizikletarekin ahaztu, eta BTT, GTXF bike eskola edo cycling saioak ere izango dira jardueren artean.
Bestalde, joan den urtean bezala, Pasaiako Udalak Donibaneko kirolgunean piraguen eta Stand up paddleko tablen alokairu zerbitzua eskainiko du. Banakako zein binakako piraguak alokatu daitezke, ordu eta erdi, hiru ordu, egun erdia, edota egun osorako. Uda osorako bonua egiteko aukera era badago. Antolatzaileek nabarmendu dute aukera paregabea dela azken hori, badia eta kostaldea ezagutuz, egun pasa ahaztezinak egiteko. Erreserbak egin edota informazio gehiago eskuratzeko 943 345 371 telefono zenbakira deitu behar dute interesdunek.
