Establezimendu txikientzako diru laguntzen xehetasunak jakinarazi ditu udalak
Oiartzungo Udalak 150.000 euro bideratuko ditu jarduera ekonomikoa berrabiarazteko. Fakturazioa erdia baino gehiago jaitsi den establezimenduentzako da.
Oiartzungo Udalak komertzio, ostalaritza eta eta zerbitzuen establezimenduak diruz laguntzeko sistema martxan jarriko duela iragarri du, plenoan onartuta. Helburua COVID-19ak sortutako egoera ekonomiko arintzea da.
Fakturazioa %50 baino gehiago jaitsi zaien establezimenduei bideratuko diete laguntza. Herrigunean zein Oiartzungo auzoetan, industriaguneetan edo merkatalguneetan dauden establezimenduak lagunduko ditu udalak, baldin eta hamar langile ez badituzte gainditzen.
Udalak lagunduko dituen kontzeptuak honakoak dira: errentamendu eta mailegu gastuak; hornidura eta zerbitzu errepikakorrak; aholkularitza gastuak; COVID-19arengatik egin beharreko moldaketen gastuak; aseguru gastuak; hardware eta softwareak eskuratzea; ERTE eta CATA kudeatzeko gastuak; eta udaberri/uda denboraldiko gatuak (50 eurotik gora).
Partidaren kopurua 150.000 eurokoa da, eta establezimendu bakoitzak 2.000 euro jasoko ditu gehienez. Udalak argi utzi nahi izan du beste erakundeek emandako laguntzekin bateragarria dela.
GAOren zain
Establezimenduek diru laguntza hori eska dezakete Gipuzkoako Aldizkari Ofizialak publikatu bezain pronto.
Eskaerak udaletxeko harreran edo bulego elektronikoaren bitartez —udalaren webgunean— egin dezakete. Establezimenduetako arduradunek aurkeztu beharko duten dokumentazioa honako izango da: eskaera orri orokorra; fakturazioa %50 baino gehiago murriztu zaien zinpeko aitorpena; langile kopuruaren RNT agiria; identifikazioa eta gastuen zerrenda.
Horretarako, Gipuzkoako Aldizkari Ofizialean deialdia argitaratzen denetik, 15 egun naturaleko epea izango dute.
