Sakonki garbitu dute Lezoko erreka
Lezo Herri Eskola eta Bekoerrota kiroldegiaren inguruan garbitzen aritu dira Lezoko Udalaren langileak. Urtea bukatu baino beste bi garbiketa saio egingo direla aurreratu dute.
Hainbat hondakin jasotzeko, garabi bat erabili behar izan dute udal langileek. Herrian zeharkatzen duen errekan “garbiketa lan sakona” egin dutela adierazi du Lezoko Udalak. Errekaren balio naturala berreskuratzea xede, Lezoko Herri Eskola eta Bekoerrota kiroldegiaren inguruko hondakinak jasotzen jardun dute Lezoko udal langileek, kale garbiketa brigadako kideak alegia.
Ohikoak izaten dira hondakinen bilketak inguru horretan, batez ere plastikoenak. Azken garbiketa saioetan, ordea, “urrats bat gehiago” eman dute udalaren aburuz, hainbat urtez pilatutako hondakin zaharrak ere jaso dituztelako. Jasotako hondakin gehienak dagoeneko errekaren ibarretan erdi lurperatutako objektuak ziren. Erosketako orgatxoak, eserlekuak, obra hondakinez betetako zakuak, metalezko pieza handiak, plastikozko lona handiak edota oihalak,; hori guztia jaso da Lezoko erreka estuan. Hainbat gauza ateratzeko garabi bat ere erabili behar izan zuten langileek.
Ekintza hauek, errekaren itxura naturalerantz joatea dute helburu. Txikia izan arren, Lezoko errekak izugarrizko eragina du gertuko ekosistemarengan. Errekaren balio naturala berreskuratzen bada, inguruak ere nabariko du. Esaterako, bazterretako landareak kudeatzeko irizpide berriak ezarri ditu Lezoko Udalak, URA Uraren Euskal Agentziaren oniritziarekin. Errekako zuhaixkak berreskuratuz, adibidez, bertako faunak babesgune bat gehiago izango du eta uraren tenperatura baxuagoa izango da, itzalaren ondorioz.
Ingurumenarekiko dute konpromisoaren adibide gisa, ur hondakinen isurketei “konponbide bat ematea” aipatu dute. Isurketa horiek nabarmen murriztu dira eta uraren kalitatea egokia da egun.
