Hilaren 29an zabaltzeko egokitzapenak egiten ari dira Bekoerrotan
Hilaren 29an zabaltzeko egokitzapenak egiten ari dira Bekoerrotan. Besteak beste, gimnasioan eta fitness gelan segurtasun espazioak ezartzen ari dira.
Bekoerrota kiroldegiaten sarrera. Hilaren 29an, astelehena, zabalduko dituzte Lezoko kirol instalazioak, Bekoerrota kiroldegia eta Altzate igerilekua. Udalak jakinarazi du horietan egokitzapen lanak egiten ari direla, eta Bekoerrotakoen berri eman du. Hala ere, udalak hilaren 22an jakinaraziko ditu bi instalazioen erabilerarako baldintza zehatzak.
Bekoerrotan, adibidez, aforo eta segurtasun arazoak saihesteko lanean ari dira. Zabaltzerakoan, gimnasioak eta fitness zerbitzuak COVID-19aren krisiaren aurretik aforo berbera izango dutela adierazi du udalak. Izan ere, muskulazio gela handitu egingo dute, eta aldi berean, fitness gelako hainbat makina pistara jaitsiko dituzte. Horrela, bai gimnasioan zein fitness gelan espazio zabalagoa izango dute bertan izango direnek.
Bestelako guneak
Udalak, Bekoerrotako egokitzapen lanez gain, herriko bestelako kirol eremuen gaineko informazioa eman du. Hemen zehaztasunez:
- Lezoko ibilbideak eta bidegorriak zabalik daude. Ibilbideen gaineko informazio osoa esteka honetan sartuta lor daiteke.
- Josetxo Etxandi (Goiko Plazakoa) eta Altamirako frontoiak zabalik daude, plaza izaera dutelako.
- Saldiseko, Tiñelu atzeko, Lopeneko eta Altamirako saskibaloi guneak, eta Bekoerrotako mahai tenis eremua zabalik daude.
- Bekoerrotako skate parkea itxita dago.
- Parke bio-osasungarriak (kaleko gimnasia egiteko gailuak) itxita daude. Hala ere, udalak iragarri du ordutegi zehatz batzuetan zuzendutako saioak antolatuko dituela. Aurrerago emango du horien berri.
Kirol orientazioa
Bestalde, udalak gogorarazi du Kirol Orientazio Zerbitzuak (KOZ) martxan jarraitzen duela, BIzi ohitura osasungarriak aurrera eramateko aholkua jaso daiteke KOZen bidez. Herritarrak aktibo eta osasuntsu mantentzeko baliabidearekin harremana egiteko, deitu 663 228 031 telefono zenbakira edo idatzi haien posta elektronikora.
