'Bizi Errenteria', tokiko ekonomia suspertzeko apustua
Bizi Errenteria iniziatiba aurkeztu du Errenteriako Udalak gaur. COVID-19aren ondorio ekonomikoei aurre egiteko martxan jarritako Talka eta Suspertze Planaren barruan abiarazi dute iniziatiba.
Gaur aurkeztu dute Bizi Errenteria iniziatiba. Agazkia: Herri bizia Bizi Errenteria iniziatiba aurkeztu du Errenteriako Udalak gaur. COVID-19aren ondorio ekonomikoei aurre egiteko martxan jarritako Talka eta Suspertze Planaren barruan abiarazi dute iniziatiba. Helburua, herriaren eta herritarren suspertze ekonomikoan eragitea, baina ez edozein modutan, pertsonak erdigunean jarrita eta Errenteriako ekonomia sektoreen arteko harremanak sendotuz baizik. Askotariko ekintzak aurreikusi dituzte: erosketa bonuen banaketa herritarren artean, ekonomia dinamizazio jarduerak eta kultur eskaintza oparoa prestatu dute Zuk Errenteria bizitzeak egiten du herri lelopean.
Aizpea Otaegi alkateak, Eneko del Amo (EH Bildu), Jose Angel Rodriguez (PSE-EE), Elixabete Murua (EAJ) eta Jon Collar (Elkarrekin Errenteria) alderdietako ordezkariekin egin du aurkezpena. Errenteriako gizartea, kultura zein ekonomia ekosistema aberatsari esker, gaur egun, Errenteria erreferentziazko gunea dela Oarsoaldean esan du Otaegik, “posizio hori indartzeko asmoz, tokian kontsumitzeko deiaz harago, Bizi Errenteria iniziatiba, elkartzeko topagunea, elkarri aitortza egiteko, guztiok egindako lanaz elkarrekin gozatzeko abagunea izan dadin sortu da”. Iniziatiba, udalak sustatutako gehienak bezala, elkarlanetik sortu da, eta eragile ekonomikoak eta gizarte zein kultur eragileak konplizitateak ehuntzen jarri ditu. Elkarlan horren emaitza da, beraz, Bizi Errenteria, ekarpen eta ideien zaparrada bilketa. Horren harira “uda berezia” iragarri dute, “udalak apustu nabarmena egin baitu herritarrok herria bizi dezagun, Errenteria biziberritzeko aukera guztion esku jarrita”.
Tokiko ekonomia sustatu nahi du, baina ez hori bakarrik, herriari bizitza eman, elkar zaintzen jarraitu, “zentzu zabalenean herri egiteko” abiatu dutela erantsi du alkateak. Horretarako bi motatako jarduerak izango dira datozen hilabeteetan: batetik, ekonomia jardueren dinamizazioa bilatzen duten ekintzak abiatuko dira —erosketetarako planak, ibilbideak, apaintzeak, herritarren parte hartzea sustatzeko ekimenak…—; eta bestetik, uda osoan zehar egingo den 30 ekitalditik gorako programazioa aurreikusi dute—Kultur emanaldiak, Errenteriaren 700. urteurrenarekin lotutakoak, kirol saioak…—.
Merkataritza, ostalaritza, zerbitzu emaileen eta bestelako eragile ekonomikoen dinamizazioa eta kultur programazioa uztartzeko, zeharkako lanketa egingo da, “hartara, Errenterian aisialdirako benetako aukera eskainiko zaio askotariko publikoari”. Kultur programazio eta dinamizazio hori, gainera, auzo guztietara eramango duela erantzi du udalak.
Iniziatibara atxikitzeko deia
Iniziatiba garatu ahal izateko ezinbestekoa da Errenteria-Oreretako ekonomia eragileen parte hartzea, beraiek dira protagonista eta motor, finean, eta dei zehatza egin diete gaurko agerraldian udal ordezkariek: bat egin dezaten, atxiki daitezen. Horretarako, Bizi Errenteria iniziatibak martxan duen webgunean aurkituko duten formularioa bete eta bidali behar dute.
Bizi Errenteria iniziatibak marka propioa du. Marka hori egiteko hiru elementutan oinarritu da udala: B hizkia, zirkulua, eta geolokalizazio ikonoa. “B hizkiak herrian bertan bizitzeari eta herriari berari bizitza emateari egiten dio erreferentzia; bertan dauden aukeren aldeko hautu bakoitza, tokiko ekonomia balioetsi eta herri bizia eraikitzeko urratsa dela, alegia”, azaldu dute. Zirkuluak, berriz, komunitatea islatu nahi duela azaldu dute, baina baita, ekonomia zirkularrari keinu egiten diola ere, “ekonomia eredu horren aldeko sentsibilizazio tresna ere bada eta Bizi Errenteria iniziatiba”. Geolokalizazioaren ikonoarekin, azkenik, Errenteriari eta errenteriarrei egiten die erreferentzia, “iniziatiban esku hartu duten tokian tokiko eragile guztiei: herritarrak, merkatariak, zerbitzu emaile diren enpresari txikiak, gizarte zein kultur eragileak”.
Iniziatibak marka propioa du, baina ez hori bakarrik, behar bezala azaldu eta zabaltzeko bideoa ere egin dute, “bideoaren bidez islatu nahi izan dugu kontsumitzaile, merkatari, ostalari zein enpresa txikiak, denak direla herritarrak, eta guztiak dutela zer esana Errenteriako Ekonomia suspertzeko garaian. Rol aldaketa jaso, merkatariak erosle bihurtu eta ekonomia zirkularraren onura islatzen duen kate bat sortu da”.
Sarean ere badu bere lekua iniziatiba berriak. Haren gaineko guztiak, Bizi Errenteria webgunean jasoko dituzte —parte hartzaile, jarduera, agenda, albisteak—. Web gunea, dinamikoa izango da, iniziatibak aurrera egin ahala edukiz betetzen joango dena. Sare sozialetan berriz, #BiziErrenteria traola erabilita partekatuko dituzte edukiak.
