Bost urterako hitzarmen berria sinatu dute Albaolak eta Oronak
2014an sinatu zen lehen hitzarmena. Ordutik elkarlanean izan dira Albaola Itsas Kultur Faktoria eta Orona Fundazioa.
Ezkerretik eskuinera, Xabier Agote Albaolako zuzendaria, Iñigo Marquet Oronako garapen zuzendaria eta Erme Pedroso Albaolako kidea. Albaola Itsas Kultur Faktoriaren eta Orona Fundazioaren harremanak jarraipena izango du. Bost urterako hitzarmen berria sinatu dutela jakinarazi dute Albaolak eta Oronak. COVID-19ak kultura eta ondarea gogor jo dituen honetan beraz, kooperatibak Albaola babesten jarraituko du. Nahi duen enpresak edo gizabanako orok, ekarpenak egin ahal dizkio Albaolari.
Urrats berri eman dute beraz bien arteko harreman arrakastatsuan, izan ere, 2014ean hasi ziren elkarlanean, Albaolako irisgarritasun azpiegiturak besteak beste, Hernaniko kooperatibak egin zituen. 2018an, lehen hitzarmen horren bosgarren urteurren jaia faktorian ospatu zuten, kontzertu batekin.
Esparru ezberdinetan jarduten badute ere, hainbat helburu partekatzen dituztela nabarmendu dute; ondare historiko eta kulturala berreskuratzea baita inguruak garatzea ere. Albaolako proiektu ospetsuena, San Juan baleontzia alegia, ondo irudikatzen du bien arteko lotura. Itsas teknologia espezializatuak inguruko sektoreen suspertze ekonomikoa eragin zuen eta ondorioz munduan zehar zabaltzeko moduan izan ziren.
Gaur egun, San Juan baleontzia eraiki zutenetik 455 urte igaro direla, Oronak ardatz horiek bere errealitatera egokitu ditu Europan hazten jarraitzeko, eta inguruen garapena bultzatzeko.
