Eguzki: "Hainbat txoriren habitata suntsitu dute Esnabideko obrek"
Garai bateko eskemak alde batera utzi eta "betiko akatsak" ez errepikatzeko garaia dela uste du Eguzkik, eta eskaera zehatza egin die horren harira gai horretan eskumena duten erakundeei: "Benetako konpromisoa hartu eta naturarekin begirunea izan dezatela".
Esnabideko eremuan lanak. Argazkia: Eguzki Txorruak, Karnabak, birigarroak eta zozoak bizi dira, besteak beste, Esnabide inguruan. Horiei guztien habitata suntsitu dela salatu berri du Eguzki Talde Ekologistak, bertan egiten hasi diren obrekin. Ez hori bakarrik, zuhaiztiari ere egin diote lan horiek; izan ere, bertan tamaina eta garrantzi handiko zuhaitzak daudela nabarmendu du Eguzkik, “haritzak, gaztainondoak, eta ehun urte inguru dituen makal bat. Fauna eta flora hori guztia desagertzeko arriskuan dago, baita auzotarrek paseatzeko asko erabiltzen duten berdegunea ere”.
Egoera hori ez dela Esnabide eremura mugatzen salatu du, gainera, “zoritxarrez gure herriko beste leku batzuetan gerta daitekeen zerbait da, hor ditugu Gamongoa eta Altzate, besteak beste”.
Ulergaitza egiten zaiela hain urriak diren berdeguneak suntsitzen jarraitzea esan du talde ekologistak, haserre, eta administrazioaren mezu “kontrajarria” agerian utzi du, “bidaltzen diguten mezua ez dator bat benetan gertatzen ari denarekin. Esaten digute ezin dela lurzoru gehiago kontsumitu, baliabideak mugatuak direla, bioaniztasuna babestu behar dela, klima aldaketaren aurka borrokatu behar dela… Esaldi hutsak baino ez dira”.
Garai bateko eskemak alde batera utzi eta “betiko akatsak” ez errepikatzeko garaia dela uste duela erantsi du eta eskaera zehatza egin die horren harira gai horretan eskumena duten erakundeei: “Benetako konpromisoa hartu eta naturarekin begirunea izan dezatela, eta egungo egoerara egokituta dagoen kudeaketa eredugarri eta arduratsu bat egin dezatela”.
