Hilaren 25ean egingo da konposta guneen jarraipen bisita
Hilero legez, 9:00etan abiatuko dira Altamira, Andreone, Aralar, Arretxene eta Lopeneko konpostaguneetara. Parte hartzen dutenek musukoa eraman beharko dute bisitak iraun bitartean.
Altamira, Andreone Aralar, Arretxene eta Lopeneko konpostaguneetara bisita egingo da. Udalak jakitera eman duenez, hilaren 25ean egingo da Lezoko konposta guneen hurrengo jarraipen bisita. Koronabirusari aurre egiteko neurriak direla eta, ekintzan parte hartzen duen pertsona orok musukoa jantzita eraman beharko du, bisitak iraun bitartean. Maskararekin batera, zentzuzko segurtasun neurriak bete beharko dira, gutxieneko tartea zaintzearena adibidez.
Ohiko legez, goizeko 9:00an abiatuko dira, Lezoko bost konpostguneetara, Altamira, Andreone, Aralar, Arretxene eta Lopenekora alegia. Segurtasuna eta higienea zaintzen bada, hondakinak konpost gisa kudeatzen jarrai daitekeela nabarmendu du Lezoko Udalak. Zaindu beharreko neurri horiek hauek izango dira: bi lagun egotea gehienez konpostagunean, edota erabiltzaileen arteko distantzia bermatua egotea. Hondakinak edukiontzian sartzean, nahastu nahi bada, eskularru eta maskararekin egin beharko da.
Hala ere, Lezoko Udalak ziurtatu du gaur gaurkoz ez dagoela COVID-19a konpostaren bitartez kutsatu daitekeen inongo adierazlerik. Hori dela eta, lezoarrak konposta egitera deitu dituzte udaletik. Hilaren 25ekoa, udako etenaldia baino lehen egingo den azkenekoa izango da. Irailean berrekingo zaie jarraipen bisitei.
