Konposta kutxa berriak, Aralar gunean
300 litroko edukiera zuten 20 kutxa kendu, eta horien ordez, 700 litroko edukiera duten bederatzi jarri ditu udalak.
Aralarko gunean konposta kutxa berriak jarri ditu udalak. Aurrekoak baino edukiera handiagoa dute berriek eta konposta guneko erabilera erraztu, antolaketa optimizatu eta konposta bera hobetzeko hartutako neurria dela azaldu du udalak. Bost dira konposta guneak: Altamira, Arretxene-Txulotxo, Aralar, Andreone eta Lopene, eta horietan 68 familiek hartzen dute parte, ia 200 lezoarrek.
300 litroko edukiera zuten 20 kutxa kendu, eta horien ordez, 700 litroko edukiera duten bederatzi jarri ditu udalak. Konposta kantitate edota dimentsio handiagotan egitean, tenperatura altuagoak lortzen dira, eta ondorioz, konpostaren kalitatea hobetzen da organikoan dauden patogenoak hiltzen direlako. Aralarren hamahiru familiek egiten dute konposta, eta orain, aldaketarekin, familia gehiagorentzat izango da lekua. Kutxak hiru taldetan banatu dituzte, eta talde bakoitzean 4-5 familiek hartuko dute parte, eta hiru konposta kutxa izango dituzte: organiko freskoarentzat bat, eta heltzen ari den konpostarentzat beste biak.
Hondakinen %40 inguru organikoa da, eta auzo konpostaren bidez, hondakin organiko horiek modu iraunkorrean tratatu daitezke, herrian bertan kudeatuz, eta inolako kutsadura sortu gabe.
Bost konposta gunetan lekua dago familia berrientzat; interesdunek posta elektronikora mezua bidali edo 647 057 402 telefono zenbakira whatsappa bidal dezakete.
