Ohitura onei eutsiz, aurten ez dira faltako Gazte Eguneko kamisetak
Sanferminetako herri bazkaria bertan behera gelditu den arren, kamisetak egingo direla iragarri dute Gazte Eguneko antolatzaileek. Ostegunetik igandera Gure Zumardian izena emateko aukera izango da.
2019ko Gazte Eguneko artxibo irudia. Bazkaria bertan behera gelditu den arren, kamisetak ez dira faltako aurten. Han hemenka ekintza zehatzak egingo badira ere, dagoeneko ez da albiste herrietan ez direla jaiak ospatuko aurten. Koronabirusak eta hari aurre egiteko segurtasun neurriek ez dute halakorik ahalbidetzen. Egoera honen aurrean, Antxoko San Fermin jaietako Gazte Eguneko herri bazkaria, bertan behera geldituko da. Baina ez da dena galdu.
Betiko ohiturei eutsiz, aurten ere Gazte Eguneko kamisetak egingo dira. Antolatzaileek jakinarazi dutenez, ostegunetik igandera (hilaren 18tik 21era) Gure Zumardian izango dira, kamiseta nahi duenak, bertan izena eman dezan. Ostegunean eta ostiralean 18:00etatik 20:00etara eman ahalko da izena eta larunbat eta igandean 12:00etatik 14:00etara. Segurtasuna bermatze aldera, musukoa erabili beharko da.
Kamisetak zazpi euro balio ditu eta izena ematen den unean ordaindu beharko da. Ahal dela, diru kopuru zehatza eramatea eskatu dute. Ez da aukerarik izango kamiseta epez kanpo lortzeko.
