Babesa inoiz baino beharrezkoagoa du Hibaikak
Egoerak baldintzatuta hasiko da arraun denboraldia. Ate joka dago jada, eta horren harira, zaleei, herritarrei, enpresa eta saltokiei, eta instituzioei laguntza ekonomikoa eskatu die Hibaika Arraun Elkarteak, "inoiz baino beharrezkoagoa dugulako".
Halako uneak, ospakizunak eta lorpenak bizitzen jarraitzeko beharrezkoa du laguntza eta babesa HIbaika Arraun Elkarteak. Egoerak baldintzatuta hasiko da arraun denboraldia. Ate joka dago jada, eta horren harira, zaleei, herritarrei, enpresa eta saltokiei, eta instituzioei laguntza ekonomikoa eskatu die Hibaika Arraun Elkarteak, “inoiz baino beharrezkoagoa dugulako”. Eskatzera baino, eskaintzera datozela argi utzi nahi izan du Ondartxo eta Oiartzun ibaia egoitza eta jardun leku dituen klubak; izan ere, herritar, eragile, enpresa eta instituzioei bakoitzak ahal duenarekin alea jar dezan eskatu die, baina trukean, herriaren izena, Errenteriaren izena lau haizetara zabaltzen jarraituko dute arraunlariek: Kluba harrobian eta umiltasun balioetan sostengatzen bada ere, Errenteriari irudi eta prestigioan itzultzen dioguna askoz ere gehiago da”.
Hiru hilabete iraungo duen arraun denboraldian, estropada ugari jokatuko dituzte Hibaikaren bi ontziek —horietako batzuk telebista bidez ikusi ahalko direnak— “eta Errenteriaren izena fokupean eta erakusleihoan jartzeko baliatuko dugu urtero legez, bi ontzietako arraunlariek duten onena emanez. Horregatik eskatzen dugu denok gure aletxoa jar dezagun, gure arraunlariek euren jardunarekin jarraitu ahal izateko gutxieneko baliabide batzuk eskaini ahal izateko”.
ETE Ligako titulua defendatzera irtengo da emakumeen trainerua; eta mutilen ontzia, berriz, ziklo berri batean murgilduta eta aurpegi berri askorekin KAE2 Ligako goi postuetan finkatzen saiatzera klubak azaldu duenez.
Une honetan 100 bazkidetik gora ditu Hibaikak herrian, “elkarrenganako leialtasuna eta konpromisoan sakondu nahi genuke, denek irabaz dezagun”.
Hibaikako laguntzaile direnek, herriko kirola eta arrauna, zehazki, sustatzearekin batera abantailak lortzen dituzte. Hala, %10eko deskontua dute Rosmin saltokian salgai dagoen klubeko arropan. Ekainean egiten den traineruen aurkezpenerako gonbidapena ere jasotzen dute laguntzaileek, bestalde, baita laguntzaile karneta ere. Laguntzaile egin nahi dutenek, formulario hau bete eta 30 euro sartu behar dituzte ES16 3035 0011 23 0110142924 kontu korronte zenbakian. Formularioa beteta eta diru sarreraren ordainagiria Rosmi dendara eraman, edo posta elektronikoz bidal dezakete.
Horretaz gain, harremanetarako lau bide ditu Hibaikak, posta elektronikoa, webgunea, Twitter kontua eta Facebook kontua.
