[Bideoa] Hainbat ekintza sinboliko Donibanen San Joan bezpera dela oroitzeko
Aurten ez da ospakizunik izango, ezta surik ere ez. Dena dela, 19:30etako txupinazoak eta kanpaiek iragarriko dute gaurkoa urteko gaurik motzena dela.
Ostiralean hainbat herritarrek suaren inguruan dantzatu zuten Mitxintxolan. San Juan bezpera da gaur, udako solstizioaren ataria. Aurten baina, gauak ez du ohiko ke usaina izango. Normaltasun berria hasi dela, suak egitea debekatu dute, jende pilaketarik ez emateko. San Joan eguna, nola ez, Pasai Donibaneko jai garrantzitsuenetako bat da, eta ospatzeko modutan ez badaude ere, keinu txiki bat egingo zaie herritarrei.
Ez da ohiko San Joan bezpera izango, baina txupinazoak berdin-berdin iragarriko du gaurkoa, urteko gaurik motzena izango dela. Txupinazoarekin batera, kanpaiak ere joko dituzte. Biak 19:30etarako daude iragarriak. San Juan martxa ere entzun ahalko da megafoniaren bitartez.
Amaitzeko, herritar talde batek grabatutako bideoa proiektatuko da herriko tabernetan. Bideoa, joandako ostiralean grabatu zuten (hilaren 19a) Mitxintxolan. Hauxe da emaitza. Bideoa, Axier Lasaren Youtube kontukoa da.
