Bekoerrotako erabiltzaileek ez dute hitzordurik eskatu beharko
Bekoerrotako erabiltzaileek ez dute hitzordurik eskatu beharko. Itxiera aurretik zeuden postu guztiak mantenduko dira, baina horietako batzuen kokalekua aldatu dute.
Spinning bizikletak kantxan jarri dituzte. Lezoko Bekoerrota kiroldegia kudeatzen duen BPXportek sare sozialen bidez jakinarazi du azken moldaketak egiten ari direla Lezoko kirolgunean asteleheneko (hilak 29) irekierari begira. Hala, nabarmentzeko gai bat jakinarazi dute: bertara kirola egitera joateko ez da aldez aurreko hitzordurik eskatu behar.
Izan ere, distantzia eta aforo mugak kontuan hartuz, hainbat egokitzapen egin dituzte kiroldegiaren arduradunek. Horiei esker, koronabirusagatik itxi aurretik zeuden postu guztiak (zintak, bizikletak, giharketa gailuak eta bestelakoak) bere horretan mantenduko dira. Hori bai, horietako batzuk ez dira betiko tokian egongo.
