Lezoko Aiton Borda elkartea berriro zabalik ekainaren 30etik aurrera
Datorren asteartetik aurrera erabiltzaileak egoitzara bueltatu ahal izango dira osasun-neurriak jarraituz eta jarduera eskaintza murritzagoarekin.
Aiton Borda zuzendaritza batzordea. Artxiboko argazkia. 
Hiru hilabetez itxita egon ostean, Aiton Borda elkarteak datorren asteartean, hilak 30, berriro ateak zabalduko ditu. Erabiltzaileen zein bertako langileen segurtasuna bermatu ahal izateko, ohiko jarduera guztiak ezingo dira oraindik martxan jarri, hala nola, gimnasia edota bingoa. Bien bitartean, masajista (uztailaren 2an) eta podologo (uztailaren 7an) zerbitzuak eskainiko dira.
Egoitzak okupazio murriztua izango du: 28 lagun gehienez goiko aretoan eta 8 beheko gelan. Gainera, bertara doazen guztiek musukoa derrigorrez jantzi beharko dute eta eskuak gel hidroalkoholikoarekin maiz garbitzea eskatuko zaie, segurtasun distantzia mantentzearekin batera. Bertako langileak izango dira erabilitako materiala eta altzariak desinfektatzeaz arduratuko direnak.
