Alokairuko parke publikoan sartzen diren etxebizitza hutsak berritzeko diru laguntza lerroa martxan du udalak
Hutsik dauden etxebizitzak bizirik nahi ditu udalak, eta aldi berean, alokairu duin baten beharrean daudenei irtenbide bat eskaini. Horretarako, diru laguntza lerroa sortu du.
Hutsik dauden etxebizitzak bizirik nahi ditu udalak, eta aldi berean, alokairu duin baten beharrean daudenei irtenbide bat eskaini. Horretarako, diru laguntza lerroa sortu du. Zehazki, alokairuko parke publikoan sartzen diren etxebizitza hutsak berritzeko diru laguntzak dira, eta horiek eskatzeko epea zabalik da.
Diru laguntza jaso nahi dutenek ezinbestean bete beharko dituzte hainbat baldintza: derrigorrezkoa da, adibidez, etxebizitza hutsa hori ASAP edo Bizigune programetan sartzeko ezinbesteko diren obrak egiteko izatea. Diruz lagunduko direnak, berriz, honakoak izango dira: obrak egitea, ekipamendua erostea, edota eraginkortasun energetikoaren agiria egitea.
100.000 diru zatia bideratuko du guztira udalak diru laguntza horietara.
Laguntza jasotzeko gainera, etxebizitzek baldintza zehatzak bete beharko dituzte. Errenterian kokatuta behar dute, Bizigune edo ASAP programetan sartuta edota horietara atxikitzeko konpromisoa hartu beharko dute, eta etxebizitza hutsak gutxienez hiru urtez alokatzeko konpromisoa ASAP programari atxikita daudenen kasuan, edota sei urtez Bizigune programari atxikita egonez gero.
Eskaera egiten dutenean, udal teknikariak txostena egingo du eta ondoren, Hirigintza azpi saileko ordezkariak erabakiko du diru laguntza onartu edo ez. Lanak hasi aurretik hartuko du erabakia. Edozein modutan ere, onartutako lanak egin ondoren ordainduko du udalak diru laguntza.
Jaso daitekeen diru kopuruari dagokionean, berriz, Alokabidek eskatutako birgaitze edo ekipamenduak erosi edo instalatzeko obrak egiten dituzten jabeek edo maizterrek itzuli beharrik gabeko obraren kostu erreal eta efektiboaren %30eko diru laguntza bat jasotzeko eskubidea izango dute, Bezik gabe. Laguntza ezin izango da 3.500 eurotik pasa kontzeptu guztiengatik. Eraginkortasun energetikoaren agiriaren kasuan, laguntza %100 izan daiteke 100 eurotik gorakoa ez bada. Laguntza jasotzen dutenek, ezingo dute etxebizitza beragatik laguntzarik eskatu bost urte pasa arte.
Bideratutako diru kopurua eta gehienezko laguntza 3.500 eurokoa izan daitekeela gehienez kontuan hartuta, urtean 28 lagun eta erdik jaso ahalko dute lerro horretako laguntza —kopuru hori, guztiek gehienezko kopurua jasoko dutela suposatuta da—.
Laguntzak, oinarrietan eskatzen diren egiaztagiriak aurkezten diren hurrenkeraren arabera emango ditu udalak, aurreikusitako kopurua agortu arte. Eskaerak laguntzak jasotzeko baldintzak betetzen baditu baina ekitaldi horretako diru zatia agortu den kasutan, eskaera horrek lehentasuna izango du hurrengo urteko aurrekontuan finantzaketa lortzeko, betiere eskaeren hurrenkeraren arabera.
Informazio guztia hemen kontsulta daiteke.
