Entitateen txanda da
Azaroaren 20tik abenduaren 4ra egingo da Euskaraldia. Aurten, hizkuntza ohitura aldaketak pertsonez harago entitateetan ere eman daitezkeela erakutsi nahi dute. Pasaian, 33 entitatek erakutsi diote atxikimendua jada.
Pandemiak mota askotariko jarduera eta jaialdiak bertan utziarazi ditu, ez ordea, Euskaraldia. Euskaldunen hizkuntza ohiturak aldatzea helburu dituen ariketak zutik jarraitzen du, baita indartsu ere. Bigarren edizioa buru-belarri antolatzen ari zirela iritsi zen COVID-19a, alarma egoera eta konfinamendua. Lana baina, ez zen eten herrietan; Etxealditik Euskaraldira dinamikaren bitartez, ohitura aldaketak etxetik hastera deitu dute. Orain, normaltasun berriarekin batera, martxoan etendako bideari eutsi, eta Euskaraldiaren antolaketa kalera aterako dute berriz ere.
Pasaian, Euskaraldian parte hartuko duten entitateak biltzen aritu dira, garrantzi handikoak izango baitira aurten. Izan ere, Euskaraldiaren bigarren edizioari, bigarren ardatz bat gehituko zaio. Herritarren hizkuntza ohituretan eragitea posible dela erakutsita, aurten, entitateetan ere eragitea dute helburu. Entitateak era askotakoak izan daitezke, enpresa, denda, elkarte ala erakunde publiko, besteak beste. Espazio horiek guztiak pertsonen egunerokotasunaren parte dira, eta horietan euskararen erabiltzeko aukera bermatzeak, ohitura aldaketak egonkortzen lagun dezake. Entitateei, euskara arnasgune diren espazio horiek sustatu eta babesteko eskatuko zaie aurten.
HITZAk, Pasaiako Udalarekin elkarlanean, gaiaren gaineko erreportajea egin du. Ondoko PDF orrietan ikus daiteke erreportaje osoa.
