Hemen daude eta ez dira ezkutatzen
Errenteriako LGTBIQ+ Mahaiak herritar guztiak gonbidatu ditu 1969ko ekainean Stonwall Inneko matxinadaren urteurrena ospatzera, eta horretarako, Transmaribollo Martxa antolatu du bihar larunbata 18:30ean Alabergako biribilgunetik abiatuta.
LGTBIQ+ Mahaiak Harrotasun eguna ospatzeko TRansmaribollo Martxa antolatu du. ‘Hemen gaude eta ez gara ezkutatzen’ eta ‘aski da’ oihuak ozen zabalduko ditu lau haizetara LGTBIQ+ kolektiboak asteburu honetan. 41 urte geroago errepikatuko dituzten esaldi horiek, dagoeneko Errenteria-Oreretako LGTBIQ+ kolektiboaren ondarearen zati bat dira, “hunkituta oihukatuko ditugu”.
Harrotasunaren eguna ospatuko du eta beraien sexu aukerak eta identitate anitzak aldarrikatuko LGTBIQ+ komunitateak igandean, eta horri begira, Errenteriako LGTBIQ+ Mahaiak hainbat ekintza antolatuta eta adierazpena zabaldu du. Armairutik atera eta ez direla prest berriro sartzeko eta nahikoa zela oihukatu zutenetik 41 urte pasa dira. 1969ko ekainean bota zituen ozen LGTBIQ+ komunitateak, “giza duintasun urratuetatik sortu ziren adierazpenak dira . Gaur egun, tratu txarrak, errepresioa, hilketak salatzen jarraitu behar dugu. Ezagutzen ditugun indarkeriak gaur arte jarraitzen dute, munduko hamarnaka eta hamarnaka LGTBIQ+ pertsonen aurka”.
Borroka urte batzuetara heldu zen Errenteria-Oreretara, 1979ko ekainaren 10ean Vicente Vadillo Santamaria Francisen hilketaren protesta gisa. Espainiako polizia batek hil zuen Francis. Egun hartan, bollerak, marikak, bidelagunak… kalera atera ziren, eta lehen eskaera zehatzak egin zituztela ekarri du gogora errenteriako LGTBIQ+ Mahaiak. Ordutik fruituak jaso dituzten ezbairik ez du kolektiboak: “Orereta-Errenteriako LGTBIQ+ biztanleen diagnostikoa egin da duela urtebete, LGTBIQ+ Mahaia badago, eta lorpena da zalantzarik gabe, topagunea baita komunitatearen eztabaida, proposamenak, borrokak eta elkarri zaintzeko espazioa”.
Errenteriako LGTBIQ+ Mahaiak herritar guztiak gonbidatu ditu 1969ko ekainean Stonwall Inneko matxinadaren urteurrena ospatzera, eta horretarako, Transmaribollo Martxa antolatu du bihar larunbata 18:30ean Alabergako biribilgunetik abiatuta. Hortik irtenda, Errenteria-Oreretan LGTBIQ+ borrokaren erreferente ezberdinak bisitatuko dituzte; aldarrikapena eta historia uztartuko dituzte eta tamalez, itzalean dauden erreferenteak argitara ateratzeko ariketa egingo dute, ezinbesteko urratsa, bestalde, sexu eta identitate askatasuna lortzeko bidean; eta lehen aldiz, Errenteria-Oreretako sarrerako biribilgunean dagoen mastan altxako dute ortzadarraren bandera, sexu askapenaren aldeko borrokaren ikurra”.
Lore eskaintza eta agurra ez dira faltako Iztieta eta Nafarroa etorbidea batzen dituen ortzadar koloreko zebrabidean. Bertan dago kokatuta Francisen omenezko oroigarria eta haren aurrean dantzatuko diote agurra. Martxa amaitzeko Herriko Plazara abiatuko dira, eta ortzadar bandera jarriko dute udaletxearen balkoian.
LGTBIQ+Mahaiak martxara joatera deitu du, hori bai, segurtasun neurriak hartuta: maskara eta distantzia fisikoa bermatuta, alegia.
Libre izan nahi dute, eta hori ez da LGTBIQ+ kolektiboaren ardura, ez behintzat kolektiboko kideena bakarrik, gizarte osoarena baizik; norbanakoarena eta guztiona: “Hemen edo planetako edozein lekutan zapaltzen, zigortzen, jazartzen gaituzten lege, kode eta ohituretatik aske bizi nahi dugu”. Eginkizun horretan, jendarte osoak du ardura.
