Arditurriko hezeguneak auzolanean ezagutuko dituzte, igandean
Otsamantegi eremuan bi hezegune sortuko dituzte, auzolanean. Udala eta Aranzadi Zientzia Elkarteak elkarlanean antolatu dute lana.
Otsamantegi inguruan prestatu dituzte putzuak. Oiartzungo Ingurumen Astea bertan behera geratu zen —martxoaren bukaeran egitekoak ziren—, baina orduko ekitaldi bat berreskuratuko dute igandean: Arditurrin hezegune pare bat sortzearena.
Udalak eta Aranzadi Zientzia Elkarteak antolatu dute ekitaldia. Auzolanean, bi hezegune sortuko dituzte Otsamantegi inguruan. Bertara joateko, 10:00etan geratu dira Arditurriko aparkalekuan, eta bi orduz arituko dira auzolanean.
170 eta 36 metro koadroko bi putzu prestatu dituzte, eta horiek ezagutuko dituzte. Putzuak mikrohezegune garrantzitsuak izan ohi dira ekosistemarentzat, batez ere anfibio eta narrastientzat.
Parte hartzeko, aurretik izena eman beharko da 943 46 61 42 telefono zenbakira deitu daiteke. Bestela, Aranzadi Zientzia Elkartearen helbidera idatz daiteke, e-posta bidez. Auzolaneko boluntarioei hamaiketakoa eskainiko dietela jakinarazi dute.
