Euskal Herriko Pala Txapelketa Irekia berriro martxan jarriko dute
Segurtasun neurri guztiak beteta, datorren asteburuan berriro bueltatuko da Giriziaren txapelketa. Abuztuan bukatzea aurreikusi dute.
Otsailean jokatu zituzten azken partiduak. Orduko irudia da hau. Euskal Herriko Pala Txapelketa Irekia negu eta udaberri arteko kontua izan ohi da, baina aurten udaran bukatu beharko dute. Girizia elkarteko pilota sailak jakinarazi duenez, datorren asteburuan txapelketa bueltatuko da. COVID-19ak eten zuen txapelketa, bigarren fasean zenean.
Oiartzungo Udalaren baimena jaso dutela adierazi dute, eta segurtasun neurri guztiak beteko dituztela. Partidak, —hau ez da aldatuko— Madalensoro pilotalekuan jokatuko dituzte.
Txapelketa bigarren fasean sartuta dago. Datorren asteburutik aurrera, partida guztiak kanporaketa modura jokatuko dituztela nabarmendu dute, zirt edo zart.
Dena ondo bidean, abuztuaren hasierarako bukatuko dute txapelketa. Palisten bikoteak hiru mailatan ari dira lehiatzen, eta guztira 82 bikotek eman zuten izena.
