Lezoko Eskola Agenda 21, aldizkarian
Lezoko Eskola Agenda 21en barruan herriko ikasleek egin dituzten hainbat lan aldizkari batean ikusteko aukera dago. Horrez gain, lehiaketa ere egin dute.
Aldizkariaren azala. Lezoko ikastetxeetako ikasleek klima aldaketaren eta elikaduraren gaia landu dute aurten Eskola Agenda 21 egitasmoaren barruan. Hezkuntzaren bidez, garapen iraunkorraren alde egiteko egitasmoa da Eskola Agenda 21. Hala, ikasleek urtean zehar zer landu duten jasotzen duen aldizkaria publikatu dute, herriko gazteen ekarpenekin.
Horrez gain, ikasturte honetan lehenengoz, lehiaketa abian jarri dute. Horren helburua izan da elikaduraren eta klima aldaketaren gaian sakontzeko aukerak ematea ikasleei. LHko ikasleek marrazkiak egin dituzte; DBHkoek, berriz, argazkiak.
Argazkien atalean sariak lortu dituztenek bertako produktuekin osatutako saskia jasoko dute; LHko marrazkilariek, berriz, zinemarako sarrerak jasoko dituzte (denek), ez baita irabazlerik izan. Hori bai, osasun egoera apaltzen denean joan ahalko dute zinemara.
Ikasturtean zehar egindako lanekin sortutako aldizkaria ikusteko, klikatu ondoko esaldian: Lezoko Eskola Agenda 21, aldizkaria.
