Zergen itzulketa eta hobariak, egoera arintzeko
Errenteriako Udalak urratsak egiten jarraitzen du COVID-19ak eragindako egoera arintzeko, ordezkatuta dauden talde politiko guztiek aho batez onartutako Talka eta Suspertze Planaren barruan.
Ordenantza fiskaletan aldaketak onartu zituen udalak asteartean zergen itzulketa egin eta hobariak ezarri ahal izateko. Errenteriako Udalak urratsak egiten jarraitzen du COVID-19ak eragindako egoera arintzeko, ordezkatuta dauden talde politiko guztiek aho batez onartutako Talka eta Suspertze Planaren barruan. Tasa, zerga eta hobariekin zerikusia du abian jarri duen azken neurriak. Horien gainean bi neurri onartu zituen, lehena, egutegi fiskala malgutzea, tasa guztien ordainketak norberak urte bukaera arte nahi bezala antolatu ahal izateko. Martxan da hori. Bigarrenak, tasen eta zergen itzulketa eta hobarien ezartzea biltzen du.
Azken neurri horren barruan sei egokitzapen egin ditu udalak, horretarako ordenantza fiskalen aldaketa onartuta astearteko osoko bilkuran. Hala ba, zehaztu dute zein tasa eta zerga itzuli eta zein hobari ezarriko diren, baita zein kopurutan ere. Udal Euskaltegiak, ludoetekek, gaztelekuek, eta Xeneplar Tailerrek kurtsoari dagokion %33a itzuliko diete erabiltzaileei.
Errenteria Musikalen eta Antzerki Labearen kasuan, ikasturteari dagokion %25 itzuliko die ikasleei.
Kale okupazioari dagokionean, autonomo, enpresa txiki, merkatari eta ostalaritzaren kasuan, alarma egoerak indarrean izan den epeari dagokion tasa zatia itzuliko die udalak. Merkatarien TAO, terraza, merkatu txiki eta pasabide edo badoei eragiten die.
Azkenik, eta gainerako neurrien osagarri gisa, merkatariei eta ostalariei zaborraren tasaren %25a itzuliko die udalak. Itzulketa honi, dagokion kasuetan bosgarren edukiontzia erabiltzeagatik udalak ezartzen duen %27ko hobaria gehituko zaio, beraz, guztira %52ko hobaria suposatuko du.
