MuittuLezo berritua iritsi da
Adinekoei begirako ariketa gailuak uztaileko ostegunetan erabili ahal izango dira, ordu jakinetan, eta orientatzaileen laguntzarekin.
Euskal Herria plazako kirol parkea. MuittuLezo estrategia berriz ere abian da, garai berriek eskatzen duten egokitzapenekin. Horren barruan, Lezoko Udalak jakinarazi du Andreoneko, Lopeneko eta Euskal Herria plazako kirol parkeak (ariketa fisikoa egiteko gailuak) berriz ere zabalduko dituztela, baina uztaileko ostegunetan bakarrik, hau da, hilaren 9, 16, 23 eta 30ean. Estrategia horren onuradun nagusiak adinekoak dira.
Andreoneko gailuak 10:30etik 11:30era izango dira erabilgarri, eta Lopenekoak eta Euskal Herria plazakoak 12:00etatik 13:00etara. Horietan udaleko Kirol Orientazio Zerbitzuko arduradunak egongo dira, laguntza emateko eta praktika egokiak lantzeko. Ordutegi eta egun muga erabiltzaileen segurtasuna eta osasuna bermatzeko ezarri dira.
Parkeen irekierarekin batera +60 iniziatiba abiatuko dute, adineko pertsonek ariketak egiteko jarduera da. Horien bidez, indarra, oreka edota koordinazioa lantzeko aukera izango dute. Uztaileko astearteetan egingo dituzte saioak (7, 14, 21 eta 28an), 10:30etik 11:30era Bekoerrota kiroldegiko kantxan. Doan da, eta izen ematea unean egin behar da.
Aurreko bi jardueretan derrigorrezkoa izango da musukoa erabiltzea, saio hasieran eta bukaeran eskuak garbitzea, toallak txikiak eta ur botila etxetik eramatea, eta kirol orientatzaileen jarraibideei kasu egitea.
Lezoratu 1:1
Lezoratu 1:1 iniziatiba berria martxan jarriko du udalak. Kalera ateratzeko laguntza behar dutenentzat da, haien beldurrak eta kezkak uxatuta paseotxoak eta ibilaldiak egiteko: banakako formatuan egingo da, hau da, erabiltzaileak laguntzaile baten konpainia izango du soilik. Beraz, ez da taldean egiteko paseotxoa, Tipi-Topan egiten direnen antzekoa. Anbulatorioaren nahiz udaleko Gizarte eta Kirol sailen elkarlanetik sortu dute egitasmoa.
Uztailean hasiko dira Lezoratu 1:1ekin. Zerbitzua baliatzeko interesa dutenek Kirol Orientazio Zerbitzuarekin jarri behar dute harremanetan (663 22 80 31) izena emateko. Segurtasun eta higiene neurriak ezarriko dituzte irteeretarako.
