Birtuala, baina 'Zentenarioa' izango da
Zentenarioa entzun, entzungo da, hala iragarri du musika bandak sare sozialen bidez. Hori bai, birtuala izango da emanaldia, egungo egoerak agintzen duen moduan.
Irudi hau ez da errepikatuko aurten, baina 'Zentenari' birtuala agindu du EMKE Musika Bandak. Gerturatzen ari dira madalenak, aurten baina, ez da ohiko moduan ospatzerik izango, ez kale egitarauen bidez behintzat, jai batzordeak eta udalak, arduraz eta zentzuz, bertan behera uztea erabaki dutelako. Ez da beraz, EMKEren Musika Banda elizako eskaileretan izango eta Herriko Plaza lepo txupinak eztanda egin eta Zentenarioaren notak entzuten eta dantzatzen hasteko zain. Zentenarioa entzun, entzungo da ordea, hala iragarri du musika bandak sare sozialen bidez. Hori bai, birtuala izango da emanaldia, egungo egoerak agintzen duen moduan.
Hori horrela izan dadin eta Zentenarioak huts egin ez dezan gogor lanean ari da EMKE Musika Banda eta hura osatzen duten familiako kide guztiak.
Zentenarioa bai, birtuala, baina zehaztasun gehiagorik ez dute eman momentuz. Datozen egunetan, beraz, EMKEren sare sozialak adi-adi jarraitzea egokiena, madalena ez ohikoetarako egitarau birtuala atondu dute eta.
Etxean dantzatzeko entseguak egiten hasteko, ondorengo bideoa; EMKE Musika Bandak Errenteriaren 700 urteurrenerako osatu zuen Zentenario bereziaren bideoa.
