'Kilometro Lezo' udako kultur agendak euskal musika, dantza eta antzerkia uztartuko ditu
Udako kultur agendak abuztuaren 14etik irailaren 5a arte euskal kultura suspertzeko eta Lezo kulturalki indartzeko egitasmoak antolatuko ditu. Gaur goizeko prentsaurrekoan aurkeztu du Lezoko Udalak plangintza.
Lezoko Udaleko kideak, gaur goizeko prentsaurrekoan, Judas Arrieta artistaren mural baten aurrean posatzen. 
Gaur goizean Herri Eskolan prentsaurreko bidez aurkeztu du Lezoko Udalak Kilometro Lezo udako kultur agenda. Ion Pombar Kultura zinegotziak adierazi du COVID-19ak eragindako geldialdiak inoiz baino garrantzitsuago egin duela “kultur sektorea indartu eta sustatzea” eta egitasmo hauek Lezoko kultur eragileei “bultzada bat emateko” baliatzea, “kulturarik gabe ez baitago Lezorik”, gehitu du Jesus Mari Martiarenak, Lezoko alkateak. Laura Muñoz, Ogasuneko zinegotziak, bat egin du adierazpenekin.
Kilometro Lezo-k euskal musika, dantza eta antzerkia uztartuko ditu. Abuztuaren 14etik hasita irailaren 5a arte, denera zortzi ekitaldi antolatuko dira, horiek guztiak iluntzeko 23:00etan, ostiral eta larunbatetan. Pombarrek aditzera eman du ordutegi honi esker herritarrek egunean zehar bestelako planak egiteko aukera izango dutela, eta gauez kulturaz gozatu ahal izango dute doan. Sarrerak online eskuratu beharko dira, eta aste honetan bertan irekiko da salmenta.
Egitasmoak barne-hartuko dituen artista guztiak euskaldunak dira; Xanti Val, kultur teknikariak, adierazi du “kalitatezko emanaldiak” eskainiko direla, gobernu taldeak “kulturarekiko apustu sendoa” egin baitu, eta lerro berean jarraituko dutela lanean.
Valek osasun eta segurtasun neurriak bermatzeko garrantzia ere azpimarratu du, esanez “protokolo guztia eta pixka bat gehiago” pausoz pauso jarraituko dela Herri Eskolako patioan (aire librean) egingo diren ekitaldietan. Aforoa 250 pertsonakoa izango da gehienez, eta guztiek eserita eta musukoa jantzita egon beharko dute.
Honakoa da kultur agendaren programazioa (denak 23:00etan dira, Herri Eskolako patio estalian):
-
Abuztuak 14 Haatik dantza konpainia, “Errimak bi oinetan” ekitaldiarekin.
-
Abuztuak 15 Maria Berasarte, “Lurra eta Bidea” lanarekin.
-
Abuztuak 21 Markeliñe antzerki taldea, “Crusoe” antzezlanarekin. Obra mutua da.
-
Abuztuak 22 Tenpora taldea, “Itzulika” lanarekin.
-
Abuztuak 28 Trapu Zaharra antzerki taldea, “Turistreatzen” antzezlanarekin.
-
Abuztuak 29 Ghost Number & His Tipsy Gypsies taldea.
-
Irailak 4 Murixka dantza taldea.
-
Irailak 5 Musika Eskolako rock taldea.
