Pasaian da 'Aita Mari'
Pasaian da 'Aita Mari'. Urtarrilaren 31n abiatu zen Mediterraneorantz migratzaileei laguntza emateko, eta behar zenean erreskateak egiteko.
Iritsi da Pasaiako portura Aita Mari erreskate ontzia. Berria egunkariak jakinarazi duenez, 49 egunez Palermon blokeatuta egon ondotik, gaur goizeko 11:00etan iritsi da ontzia. Garaiz iritsi ere: ordua baino lehen ailegatu da, eta Pasaiako badian ibili da itzuliak emanez lehorreratzeko ordua iritsi arte.
Portuan zain zituen, besteak beste, Zaporeak eta Ongi Etorri Errefuxiatuak elkarteko kideak, boluntarioak eta itsas salbamenduko kideak, eta baita EAJ, Elkarrekin Podemos eta EH Bilduko eledun batzuk ere.
Aita Mari portura iritsi orduko, Amaia Martinez Itsas Salbamenduko kideak salatu du Italiak ez duela salbamendu ontzirik nahi Mediterraneo itsasoan: «Gure ustez, Italiak zera nahi du, salbamendu itsasontziak bertatik ateratzea, gertatzen denaren testigurik ez izateko.». Martinezek Espainiako gobernuari leporatu dio Aita Mari ontzia eta Espainiako legedia ez babestu izana.
Urtarrilaren 31n abiatu zen ontzia Mediterraneo aldera, bidean diren migranteei laguntza ematera eta behar zenean erreskate lanak egitera. Hainbat erreskate egin ditu orduz geroztik, azkena apirilaren 13an.
