[Galeria] Sanpedrotarrak izan dira garaile Pasaiako badian
Moreek bigarren ziabogatik hartu zuten garaipena KAE 1 ligan. Hondarribiak bigarren postua lortu zuen KAE 2n, Lapurdiren atzetik; eta ETE kategorian lau ehunekok eman zioten garaipena Tolosaldeari, Zumaiarekin lehian.
Sanpedrotarrak, garaipenaren berri izan zutenean. 
ETE eta KAE ligak larunbatean hasi ziren, Pasaiako badian, erlojupeko lehian. KAE 1 ligan, San Pedrok bigarren ziabogatik hartu zuen garaipenerako bidea, denbora-marka hoberenak lortuz gainontzeko guztietan. XXI. Kepa Deun Arrantzaleen Kofradia Ikurrina moreek eraman zuten etxera, bigarren postuan Pedreña utziz (bi ehuneko gehiagorekin); hirugarrena Getariako trainerua izan zen. Hemen KAE 1 ligako estropadaren sailkapena. San Juan seigarrena izan zen, San Pedrotik 14 segundo pasatxora.
KAE 2 mailan Hondarribiak hasi zuen erlojupekoa denbora hoberenarekin, baina azken ziabogan Lapurdik abantaila hartu eta garaipena kendu zien berdeei, 18 ehunekoko desberdintasunarekin. Hirugarren postua Castrok lortu zuen, Hondarribiaren segundo berdinak eginda, baina 20 ehuneko gehiagorekin. Hibaikak 3 puntu lortu zituen, sailkapenean bederatzigarren postua lortuz. Hemen KAE 2 ligako estropadaren sailkapena.
ETE kategorian, ehunekoak izan ziren berriro ere protagonista: Tolosaldea (irabazlea) eta Zumaiaren artean lau ehunekoko aldea besterik ez zen egon. Sailkapenean hirugarren Ondarroa izan zen, eta laugarren postua San Juan Koxtape elkarteko emakumeek eskuratu zuten, Hibaikaren aurretik, ia 4 segundoko aldearekin. Hemen ETE ligako estropadaren sailkapena.
