Lapur hutsen gisa
1978ko uztailaren 13an, orain 42 urte, Espainiako Polizia Teo gozotegia zenean kristalak apurtu eta pastelak lapurtzen azaltzen zuen argazkia bolo-bolo zabaldu zen garaiko komunikabideetan. Herria txikitu eta arpilatzera heldu ziren.
Poliziak, Teo gozotegian lapurtzen. 1978ko uztailaren 13a. Greba orokorrean murgilduta dago Errenteria-Orereta bi egun lehenagotik. Iruñeko San Fermin Jaietan, German Rodriguez gaztea hil du poliziak bost egun lehenago, eta asanblada deialdiak berehala heldu dira Errenteria-Oreretara. Uztailaren 11n hasita, greba orokorra egitea erabaki du asanbladak. Lantegiak itxita, dendak itxita eta jendea kalean. Greba egunaren lehen egunean, jendea manifestazioan zela heldu da berri lazgarria, Beraun auzotik Erdialdera jaisten ari direla: Espainiako Poliziak Astigarragako Joseba Barandiaran gaztea hil du tiroz Donostiako Aldapeta kalean izandako istiluetan. Hiru egunetan bi gazte hil ditu poliziak Euskal Herrian. Amorruaren amorruz, autopista barrikadez bete dute manifestariek Beraun parean.
Auzo horretako bi bizilagun balaz zauritu ditu poliziak, eta beste asko eta asko kolpatu; greba orokorrarekin jarraitzea erabaki du asanbladak. Testuinguru horretan, jendea kalean manifestazioan zegoela heldu dira antidisturbioen hogei furgoneta edo autobus, Kaputxinoetako tuneletik barrena, herrira. Basati aritu dira. Miranda de Ebrotik (Burgos) heldutako Espainiako Poliziaren erreserba konpainiakoak dira. Erakusleihoak txikitu, sotoetan sartu eta pixa eta kaka egin, Aralar kaleko 1. atariko igogailu barruan ke potoak bota… herria arpilatu dute.
Garaiko egunkarien azaletara eta telebistako informatiboetara eraman dute Errenteria-Orereta, bolo-bolo dabilen irudiagatik: Espainiako Polizia Zumardian zen Teo gozotegiko erakusleihoa txikitu, pastelak lapurtu eta jaten azaltzen da.
42 urte pasa dira irudi horretatik, baina oraindik ere, errenteriar askoren memorian dago. Joxe Iriarte Bikilak artikulua idatzi zuen egun haietako zehaztasun guztiak bilduta Oarso aldizkariaren 53. zenbakian, gertaera izan eta 40 urtera. Basati, “oralde amorratu” gisa oroitu ditu Espainiako Poliziak bere idatzian, “komertzioen erakusleihoei, ezkaratzeei, atariei, autoen kristalei, leihoen atzean mugitzen ziren gortinei astinaldi ederra eman zieten”. Pastelak lapurtzen ari ziren argazkia egin zen ezagun, baina erloju eta irratiak ere lapurtu zituzten herriko komertzioetatik. Ikusitako ikurrina guztiak txikitu omen zituzten, baita udaletxekoa ere.
Txikitzaile eta lapur, herria arpilatzeari ekin baitzioten gero.
