200 establezimenduk egin dute bat Bizi Errenteriaren bonu kanpainarekin
Abian da Errenteriako Udalak Bizi Errenteria programaren barruan antolatu duen erosketa bonuen kanpaina.
Gaur aurkeztu dute bonu kanpaina Xabier Olaskoaga plazan. Abian da Errenteriako Udalak Bizi Errenteria programaren barruan antolatu duen erosketa bonuen kanpaina. Helburua, tokiko saltokiak dinamizatzea, bizitza ematea eta herritarrak, bertara eramatea behar dituzten horiek erostea. Finean, herriko ekonomia eta bizitza indartzea da tokiko establezimenduak indartzea.
Bertako erosketa horiek sustatzeko, bezeroentzat hobari diren bonuak helarazi ditu udalak errenteriar guztien etxeetara azken asteotan. Kanpainarekin bat egin duten establezimenduak, berriz, 200dik gora dira. Horietako bateren batean 30 eurotik gorako erosketa egiterakoan, 10 euroko bonua trukatu ahalko du bezeroak, eta kopuru horretako hobaria jaso beraz. Herritarren ordaintzen ez duten kopuru hori, udalak ordainduko dio establezimenduari.
Bonuen onuradunak bi motatakoak dira: etxebizitza berean bizi diren bizikidetza unitateak, batetik; eta 18-35 urte arteko gazteak bestetik. Bizikidetza unitate bakoitzari bi bonu bidali dizkio udalak, eta beste bi gazte bakoitzari. Gazteengan bereziki eragin nahi du udalak, izan ere, beraiek dira online erosketa gehien egiten dituztenak, bonuak berariaz beraiei bidalita, herrian kontsumitzeko ohitura sustatu nahi du haien artean.
Kanpainarekin bat egin duten establezimenduen zerrenda hemen kontsulta daiteke; halaber, establezimendu horietako bakoitzak atxikitako lokal gisa bereizten dituen Errenteria markaren biniloa jasoko dute.
Bonuen erabilera
Familia unitateek, 10 euroko hobaria duten bi bonu jaso dituzte. Atxikitako komertzioetan egindako 30 eurotik gorako erosketarengatik, 10 euroko hobaria jasoko du bezeroak; bonuak bateragarriak dira. Bonuen gaineko edozein zalantza argitzeko 010 edo 943 449 600 telefono zenbakietara dei daiteke.
Bizi Errenteria programaren bidez, herriko merkataritza, ostalaritza eta askotariko establezimenduen dinamizazioa da funtsetako bat, “herritarrek bertan kontsumitzea lehenetsi dezaten lortzea dugu helburu”.
Dinamizazio hori, orain hasi eta azarora arte luzatuko da eta sei planetan banatu da, establezimenduak jardueraren arabera multzokatuta. Hilabete honetan, arropa, zapata, osagarri, jostailu, lore, etxerako altzari, zein osagarri denden txanda izango da. Horren barruan, hilaren 23an, Liburuaren Eguna ospatuko dute aipatutako sektoretako komertzioek eta liburu dendek elkarlanean, euren eskaintza trukatuz. Hilaren 28tik 30era berriz, arratsaldez, produktuak denda atarira ateratzeko aukera izango dute herria girotzeko; solasaldi eta tailerrak ere antolatuko dituzte dendetan.
Ekintza horien gaineko informazio guztia Bizi Errenteria web orriaren eta Herri Biziaren sare sozialen bidez jakinaraziko dute.
