Endarako zentral eolikoaren proiektua hizpide Gaztañon
Lesakan Nordex enpresak Auzoberri inguruan jarri nahi duen parke eolikoaren aurka azaldu dira herritarrak eta udala bera, eta Endara Bizirik plataforma sortu dute.
Endara Bizirik plataforma. Lesakan Nordex enpresak Auzoberri inguruan jarri nahi duen parke eolikoaren aurka azaldu dira herritarrak eta udala bera, eta Endara Bizirik plataforma sortu dute. Plataforma horretako kideak Gaztañoko auzo elkartearen egoitzan izango dira hitzaldia ematen bihar, ostirala, 19:00etan hasita.
Parke eolikoak bertako herritarrei zein eremu naturalari eragingo dien kalteak azalduko dituzte hitzaldi horretan Endara Bizirik plataformako kideek. Endara eremuan egin nahi dute parke eolikoa, eta 11 haize sorgailu erraldoi jarri bertan. Proiektua gauzatuz gero, oso aberatsa den Endarako ekosistema erabat suntsituko dutela salatu du plataformak; ez hori bakarrik, bertan bizitzea ezinezkoa izango da, egungo etxe eta baserrietatik gertuegi jarrai nahi dituztelako haize sorgailuak: “Sortzen duten soinu eta bibrazio altua, erabat kaltegarria da osasunarentzat. Hemen ezingo dugu bizitzen segi, eta dugun guztia galduta, gure bizitoki maitea suntsituta, beste toki batera joan beharko dugu bizitzera”.
Proiektuaren barruan Endara inguruan jarri nahi duten haize errota bakoitzak 120 metro garaiera eta 155 metroko hegalen biraketa diametroa izango du.
