'Izan Bidea' bizikleta martxa hilaren 25ean helduko da Oarsoaldera
Sare Herritarrak antolatu duen Izan Bidea bizikleta martxaren hirugarren ekitaldia egingo dute hilaren 23tik 25era.
Aurreko urte bateko bizikleta martxako irudi bat, Errenteria-Oreretatik pasatzen. Sare Herritarrak antolatuta Izan Bidea bizikleta martxaren hirugarren ekitaldia egingo dute hilaren 23tik 25era. Oarsoaldera, azken egunean helduko da. Martxa berezia izango da aurtengoa COVID-19aren osasun larrialdiarengatik, eta horrenbestez hiru egunean egingo diren etapekin osatuko dute bizikleta itzuli hori. Euskal preso eta iheslarien aldeko aldarria lau haizetara zabaltzea du helburu dinamikak; konponbidearen aldeko alea da.
Zehazki, hilaren 23an Lekunberri eta Hernani lotuko dituzte, hilaren 24an Urduña eta Durango, eta hilaren 25ean berriz, lau etapa egingo dituzte, Hego Euskal Herrian dauden lau espetxeetatik hiriburuetara joateko: Zaballatik Gasteizera, Basauritik Bilbora, Iruñeko espetxetik Iruñera, eta Martutenetik Donostiara. Aurtengoan, beraz, ez dira hiru egunetan jarraian arituko.
Etapa guztiak goizez egingo dituzte, eta COVID-19aren egoeragatik ezarritako segurtasun eta osasun neurriak zorrotz beteko dituzte. Parte hartzaileei 10 euro eskatuko zaizkie etapa bakoitzeko antolakuntza gastuei aurre egin ahal izateko —zaintza, medikua, asegurua—. Halaber, bakoitzak eraman beharko du txalekoa eta maskara.
Izen ematea, hemen egin behar da.
Jarraian Oarsoaldeko herrietako hitzorduak:
- 09:30: Oiartzunen, Ugaldetxo-Matteon
- 10:15: Oreretan, Lartzabalgo anbulatorioan
- 10:30: Pasaian, Kaputxinoetako biribilgunean
